Імпарт

І́мпарт (па-лацінску: importare — увазіць) — увоз на мытную тэрыторыю краіны тавараў, паслуг ці капіталу.

Імпарт з пунтку гледжаньня навукі — гэта вынік міжнароднага падзелу працы ў спаборніцтве краінаў па найбольш дасканаламу выкарыстоўваньню рэсурсаў як матэрыяльных, так і нематэрыяльных.

Разам з экспартам імпарт складае гандлёвы абарот. Розьніца паміж агульнай вартасьцю экспарту і імпарту складае гандлёвае сальда.

Вартасьць імпарту лічыцца ў цэнах на ўмовах CIF, гэта значыць уключаецца вартасьць страхаваньня ды фрахта. З гэтай прычыны агульнасусьветны экспарт заўсёды менш за імпарт.

Імпарт матэрыяльных каштоўнасьцяў называецца бачны імпарт. Імпарт транспартных паслуг, турызм, страхаваньне і іншыя паслугі, а таксама пераказы грошаў юрыдычных ды фізычных асобаў за мяжу — нябачны імпарт.

Падзяляюць імпарт па яго прадмеце на:

• Імпарт тавараў
• Імпарт паслуг
• Імпарт капіталу

Рэімпарт — адваротны ўвоз тавараў, раней вывезеных па-за межы ды не пераапрацаваных там.

Імпарт рэгулюецца дзяржавамі празь некаторыя інструмэнты гандлёвай палітыкі: мыты, квоты, «дабраахвотныя» абмежаваньні, мінімальныя імпартныя цэны, тэхнічныя бар’еры ды іншыя.

Гэтыя інструмэнты маюць дзьве мэты — абарона нацыянальных вытворцаў ад міжнароднай канкурэнцыі ды фіскальная мэта.

Імпарт у Беларусі

Агульная вартасьць імпарту ў Беларусь[1] Год Млн.$ 2005 17 981,4 2006 22 100,7 2007 28 602,1 2008 39 341,3

Асноўныя краіны імпарту паводле зьвестак за 2008 год Год Імпарт, Млн.$ Расея 23 460,3 Нямеччына 2 792,3 Украіна 2 115,1 Кітай 1 414,8

Глядзіце таксама

• Экспарт