Шонэн

Шо́нэн (па-японску: 少年) — анімэ, манґа і ранабэ разьлікаваныя на пэўную аўдыторыю — хлапчукоў ды юнакоў векам ад 12 да 18 рок^[1]. Манґа гэтага тыпу публікуецца ў спэцыялязаваных журналах (аўдыторыю вызначаюць самі выдавецтвы). Шонэн займае 38,4 % рынку манґі^[2].

Апісаньне

Галоўнымі прызнакам жанру зьяўляюцца пратаганіст мужчынскай плоці, хуткае разьвіцьцё ды дынамічнасьць сюжэту. Твор у жанры шонэн складаецца больш з гумарыстычных сцэн, канцэнтруецца на тэме сяброўства, супраціву або на баявых дзеяньнях. Часьцяком галоўны гэрой адрозьніваецца шырокімі вачыма, лёгкай усьмешкай і востраконцай зачоскай^[3]. Як правіла, гэроі мужчынскай плоці ўпэўненыя ў сабе, храбрыя, турбуюцца пра сваіх сяброў, ніколі ня журацца і не здаюцца (нават калі сытуацыя бязь выхаду), а таксама, з пункту гледжаньня рэалізму, маюць вялічэзны посьпех.