Архіў Паўднёва-Заходняй Расіі

«Архі́ў Паўднёва-Захо́дняй Расі́і» (руск.: Архив Юго-Западной России, издаваемый Комиссией для разбора древних актов, состоящей при Киевском, Подольском и Волынском генерал-губернаторе) — шматтомны зборнік дакументаў і літаратурных помнікаў Правабярэжнай і Заходняй Украіны XIV—XVIII стагоддзяў. Выдадзены ў Кіеве на рускай мове ў 35 тамах (8 частак) у 1859—1914 гадах^[1].

Архіў Паўднёва-Заходняй Расіі
руск.: Архив Юго-Западной России
Жанр	гістарычныя крыніцы, зборнік
Краіна	Расійская імперыя
Мова арыгінала	руская мова
Выдавецтва	Кіеўская археаграфічная камісія
Даты публікацыі	1859—1914
Тамы	35 (у 8 частках)

Асноўнай крыніцай выдання стаў Кіеўскі цэнтральны архіў. Таксама выкарыстоўваліся дакументы, якія паступалі ў Кіеўскую камісію ад прыватных асоб, манастыроў і розных устаноў^[1].

Змест

Матэрыялы зборніка падзелены на 8 тэматычных частак. У выданне ўключаны матэрыялы па гісторыі праваслаўнай царквы XIV—XVIII стагоддзяў, пратаколы і пастановы шляхецкіх соймікаў за 1569—1726 гады, звесткі пра барацьбу ўкраінскага казацтва з польскай шляхтай у 1500—1768 гадах^[1].

Таксама зборнік змяшчае акты аб паходжанні шляхецкіх родаў, дакументы пра гарады, матэрыялы аб эканамічным і юрыдычным становішчы ўкраінскіх сялян (1498—1799), перапісы яўрэйскага насельніцтва і іншае^[1].