Беларускі сцяг (часопіс)

«Белару́скі сцяг» — штомесячны грамадска-палітычны і літаратурны часопіс, орган урада Беларускай Народнай Рэспублікі. Выдаваўся ў красавіку — верасні 1922 года у Каўнасе на беларускай мове. Выйшлі 4 нумары. Рэдактар-выдавец часопіса — Клаўдзій Дуж-Душэўскі^[1].

«Беларускі сцяг»
Тып	часопіс
Выдавец	Клаўдзій Сцяпанавіч Дуж-Душэўскі
Краіна	Літва
Рэдактар	Клаўдзій Сцяпанавіч Дуж-Душэўскі
Заснавана	красавік 1922
Спыненне публікацый	верасень 1922
Палітычная прыналежнасць	Урад Беларускай Народнай Рэспублікі
Мова	беларуская
Галоўны офіс	Коўна

Галоўная мэта выдання, на думку рэдакцыі, заключалася ў абароне незалежнай беларускай дзяржаўнасці, павышэнні грамадскай свядомасці, умацаванні волі да барацьбы шляхам асвятлення ўсіх бакоў беларускага жыцця. Разглядаў палітычныя і грамадскія падзеі ў Заходняй Беларусі, Польшчы, Літве, Латвіі і БССР, узнімаў пытанні вызваленчага руху і будучыні беларускага народа. Публікаваў артыкулы па праблемах барацьбы за адраджэнне і незалежнасць Беларусі^[2].

Аўтарамі выдання былі Аляксандр Цвікевіч, які друкаваўся пад псеўданімам А. Галынец і крыптанімам А. Ц., Вацлаў Ластоўскі, Янка Станкевіч, І. Трызна і іншыя.