Бурачок (часопіс)

У паняцця ёсць і іншыя значэнні, гл. Бурачок (значэнні).

«Бурачо́к» — самвыдавецкі грамадска-палітычны часопіс, які выдаваўся ў 1986—1987 гадах. За два гады выйшла тры нумары^[1].

«Бурачок»
Тып	газета
Заснавальнік	Алесь Бяляцкі, Вінцук Вячорка, Сяргей Дубавец, Віктар Івашкевіч
Краіна	Беларуская ССР
Заснавана	1986
Спыненне публікацый	1987
Тэматыка	грамадска-палітычны самвыдавецкі часопіс
Мова	беларуская мова
Перыядычнасць	нерэгулярная
Галоўны офіс	Мінск, Беларуская ССР

Гісторыя

Часопіс быў створаны ў 1986 годзе ўдзельнікамі моладзевага нацыянальнага руху з мэтай адкрытага абмеркавання пытанняў беларускай незалежнасці, дэмакратыі і свабоды. Назва часопіса з'яўляецца адсылкай да псеўданіма «Мацей Бурачок», якім карыстаўся класік беларускай літаратуры XIX стагоддзя Францішак Багушэвіч^[2].

Ініцыятарамі выдання былі Алесь Бяляцкі, Вінцук Вячорка, Сяргей Дубавец і Віктар Івашкевіч^[2][1].

Часопіс друкавалі на партатыўнай друкарскай машынцы на папяроснай паперы. Каб пазбегнуць выкрыцця з боку КДБ, пасля працы над кожным нумарам машынку закопвалі ў зямлю ў лесе пад Мінскам. Алесь Бяляцкі ўспамінаў пра небяспеку такой працы і пра тое, як старанна знішчаліся сляды пасля друку^[2].

Рэдакцыя распаўсюджвала часопіс паводле загадзя складзенага спісу адрасатаў, раскладаючы асобнікі ў канверты і пакідаючы іх у паштовых скрынях у Мінску або дасылаючы па пошце ў іншыя гарады^[1].

Пераслед

Пасля выхаду другога нумара КДБ пачаў адсочваць выдаўцоў і выклікаць іх на «прафілактычныя гутаркі». Падчас распаўсюджвання трэцяга нумара быў затрыманы рабочы Яўген Івашкевіч. Увесь астатні наклад часопіса, які захоўваўся ў Доме літаратара, быў канфіскаваны падчас ператрусу ў кабінеце літкансультанта Саюза пісьменнікаў Алеся Емяльянава^[1].