Бягомльскі музей народнай славы

Бягомльскі музей народнай славы — музей у г.п. Бягомль (Докшыцкі раён, Віцебская вобласць), створаны 17 красавіка 1968 г. Адкрыты 8 мая 1970 г. да 25-годдзя Перамогі над нацысцкай Германіяй. Спачатку экспазіцыя музея размяшчалася ў аднапавярховым будынку былой канторы саўгаса «Бягомльскі». У снежні 1985 г. музей пераведзены ў двухпавярховы мураваны будынак, узведзены ў 1890 г., які да 1917 г. належаў пану Булгаку. Агульная плошча экспазіцыі 474 м², 17,1 тыс. экспанатаў, з іх 13,5 тыс. асноўнага фонду.

Бягомльскі музей народнай славы
Профіль	комплексны
Заснаваны	1968
Падпарадкаванасць	аддзел культуры Докшыцкага райвыканкама.
Краіна	Беларусь
Месцазнаходжанне	Віцебская вобласць, Докшыцкі раён, г.п. Бягомль, вул. Савецкая, 17, 211730
Памеры фонду	13 405
Агульная плошча	759
Выставачная плошча	510
Плошча запаснікаў	53
Адкрыты	9.00–17.00, акрамя нядзелі і панядзелка
begoml.museum.by

Экспазіцыя

Экспазіцыя музея размешчана ў 8 залах (399 м²), 6 з якіх прысвечаны Вялікай Айчыннай вайне. Матэрыялы сведчаць пра ўдзел жыхароў Бягомльшчыны ў стварэнні антынацысцкіх падпольных груп, у партызанскай барацьбе, абароне Ленінграда, Масквы, Брэсцкай крэпасці і Сталінграда. У 2 залах матэрыялы расказваюць аб дзейнасці партызанскай брыгады «Жалязняк», партызанскага аэрадрома ў Бягомлі, аб вызваленні Бягомля ад немцаў у снежні 1942 г. Сярод экспанатаў: тэлефонны апарат і камутатар партызанскай брыгады «Жалязняк», медыцынскія інструменты, друкарскі станок і наборная каса друкарні, дзе выдавалася падпольная газета «Савецкі патрыёт», лістоўкі і інш. У музеі сабраны звесткі пра Герояў Савецкага Саюза — ураджэнцаў раёна. У 1989 г. адкрыта экспазіцыя, якая адлюстроўвае жыццё і побыт мясцовага насельніцтва. Экспануюцца творы жывапісу, скульптуры, матэрыялы пра пісьменнікаў-землякоў, ураджэнцаў Бягомльшчыны Ю. Свірку, А. Ставера, Л. Чарняўскую, кампазітара Н. Сакалоўскага.

У 1990 г. у музеі створаны 2 дыярамы: «Партызанская пераправа на рацэ Бярэзіна» і «Падземны партызанскі шпіталь» (мастакі К. М. Саломка і С. С. Шафрановіч).

Музей наведалі больш за паўмільёна чалавек.

Кіраўніцтва

Першым дырэктарам музея быў ветэран Вялікай Айчыннай вайны Рыгор Пятровіч Марозаў. Навуковым супрацоўнікам музея працаваў Пётр Мікалаевіч Добыш — партызан брыгады «Жалязняк». Дырэктары музея: у 1973—85 гг. Фёдар Міхайлавіч Літвінок (былы партызан брыгады «Жалязняк»), у 1985—89 гг. Дзмітрый Іванавіч Грабоўскі (гісторык), у 1990—2002 гг. — Уладзімір Канстанцінавіч Герасімёнак.

Гл. таксама

• Спіс музеяў Віцебскай вобласці

Літаратура

• Бегомльский музей народной славы // Витебская область. Природа, туризм, спорт, отдых = Vitebsk region /The nature, tourism, sport, rest / под общ. ред. Л. Л. Прокофьевой. — Витебск, 2005. — С. 124.
• Бягомльскі музей народнай славы // Беларуская энцыклапедыя: У 18 т. Т. 3: Беларусы — Варанец / Рэдкал.: Г. П. Пашкоў і інш. — Мн. : БелЭн, 1996. — Т. 3. — С. 391. — 10 000 экз. — ISBN 985-11-0035-8. — ISBN 985-11-0068-4 (т. 3).

Спасылкі

• begoml.museum.by — афіцыйны сайт Бягомльскага музея народнай славы