Вялікае Камайскае возера

Вялікае Камайскае возера — возера ў Пастаўскім раёне. У басейне р. Камайка (выцякае з возера), за 17 км на паўднёвы захад ад г. Паставы, каля аг. Камаі.

Вялікае Камайскае
Морфаметрыя
Вышыня над узроўнем мора	188 м[1]
Даўжыня	1,05 км
Шырыня	0,36 км
Плошча	0,25 км²
Даўжыня берагавой лініі	2,59 км
Найбольшая глыбіня	22 м
Басейн
Плошча вадазбору	9,8 км²
Размяшчэнне
Краіна	Беларусь
Рэгіён	Віцебская вобласць
Вялікае Камайскае
Вялікае Камайскае

Назва

На думку А. Ванагаса, літоўскія рачныя назвы Kamojà, Kamė, Kamaja, Kamainė, Kamatė, Kamena звязаныя з літоўскім kamas «камяк, камок» (сціснуты кавалак). Я. Атрэмбскі звязваў са ст.-рус. камонь «верхавы конь», прус. camnet «конь»^[2]. Паводле Ю. Покарнага, ад індаеўрапейскага *kem- «сціскаць» паходзяць ст.-сканд. hemja «стрымліваць», сяр.-верх.-ням. hemmen «затрымліваць», ст.-фрыз. hemma «перашкаджаць», ніж.-ням. дыял. ham, hamen «хамут», рус. хомут, англ. hem «аблямоўка», лтш. kams «камяк», літ. kamúoti «сціскаць», рус. ком і інш.^[3].

На думку В. Жучкевіча, найбольш верагоднае фінамоўнае паходжанне асновы ад слова kama — старызна, хлам. Можа быць, таксама ад літоўскага kamanos — узда^[4].

На думку І. Пракаповіча, назва мае старажытную гісторыю. Аналаг — гідронім Кама, ад удм. кам — «рака», «плынь»^[5].

Водаапісанне

Плошча 0,25 км². Найбольшая глыбіня 22 м. Даўжыня 1,05 км. Найбольшая шырыня 0,36 км. Даўжыня берагавой лініі 2,59 км. Аб’ём вады 1,67 млн м³. Плошча вадазбору 9,8 км².

Схілы катлавіны вышынёй 9—14 м, на захадзе і ўсходзе 5—6 м, пад лугам і пашай. Берагі нізкія, параслі хмызняком. У падводнай частцы катлавіны вылучаюцца 4 замкнёныя катлавіны з глыбінямі 8 м, 14,9, 18,5 і 22 м. Дно пясчанае, глыбей 2 м выслана ілам. 26 % паверхні возера занята расліннасцю, шырыня паласы 5—30 м да глыбіні 2 м. Злучана пратокай з Малым Камайскім возерам.