Вячаслаў Аляксеевіч Тарасаў

У Вікіпедыі ёсць артыкулы пра іншых людзей з прозвішчам Тарасаў.

Вячаслаў Аляксеевіч Тара́саў^[2] (руск.: Вячеслав Алексеевич Тарасов; 17 кастрычніка 1938(1938-10-17)^[1], Растоў, Яраслаўская вобласць^[1] — 20 студзеня 1997(1997-01-20)^[1], Мінск) — мастак, сцэнограф, мастак-мультыплікатар.

Вячаслаў Аляксеевіч Тарасаў
Дата нараджэння	17 кастрычніка 1938(1938-10-17)[1]
Месца нараджэння	Растоў, Растоўскі раён, Яраслаўская вобласць, РСФСР, СССР[1]
Дата смерці	20 студзеня 1997(1997-01-20)[1] (58 гадоў)
Месца смерці	Мінск, Беларусь
Грамадзянства	Беларусь  СССР
Род дзейнасці	мастак, сцэнограф, дызайнер касцюмаў, мастак-мультыплікатар
Месца працы	Дом мадэлей Беларускі дзяржаўны акадэмічны тэатр юнага гледача Беларусьфільм[1] Мастацкая літаратура
Жанр	сцэнаграфія, станковая графіка, кніжная графіка, жывапіс, мультыплікацыя, графіка і станковы жывапіс
Вучоба	Маскоўскі тэкстыльны інстытут[d] (1962)
Член у	Саюз мастакоў БССР

Біяграфія

Нарадзіўся ў горадзе Растоў (Яраслаўская вобласць Расіі). У 1962 годзе скончыў факультэт прыкладнога мастацтва^[3] Маскоўскага тэкстыльнага інстытута (спецыяльнасць — мастацкае афармленне тканін і вырабаў^[4]). У 1963—1970 гадах працаваў мастаком-мадэльерам^[4] у Рэспубліканскім доме мадэлей у Мінску. У 1971—1975 гадах мастак-пастаноўшчык^[4] у Беларускім рэспубліканскім тэатры юнага гледача. З 1976 года^[2] Вячаслаў Тарасаў — мастак-пастаноўшчык студыі мультыплікацыйных фільмаў^[4] кінастудыі «Беларусьфільм». У 1975—1976 гадах працаваў мастаком-ілюстратарам у выдавецтве «Літаратура і мастацтва»^[4] (верагодна, у выдавецтвах «Мастацкая літаратура», «Беларусь»^[5]).

Член Беларускага саюза мастакоў з 1973 года^[3].

Творчасць

У Тэатры юнага гледача аформіў спектаклі «Пэпі — доўгая панчоха» (1970) і «Новыя прыгоды Карлсана» (1973) паводле А. Ліндгрэн, «Зялёная птушка» (1972) Карла Гоцы, «Дзяўчына і красавік» Т. Яна (1971), «Адчыніце, казляняткі!» П. Макаля, «Палёт» У. Мехава і іншыя. Мастак-пастаноўшчык мультыплікацыйных фільмаў «Папяровая казка» 1976), «Казка пра вясёлага клоуна» (1980), «Песня пра зубра» (1982), «Каўбойскія гульні» (1986), «Светлячок і расінка» і іншых. Аўтар ілюстрацый да выданняў твораў В. Вольскага, К. Кірэенкі, Лопэ дэ Вэга, Ю. Свіркі, А. Твардоўскага і іншых аўтараў. Таксама Вячаслаў Тарасаў працаваў у станковым жывапісе: «Салдаты», «Юнацтва», «Зялёны луг», «Дзяцінства», «Акно» і іншыя.

Удзельнік мастацкіх выставак з 1966 года^[3]. Творы мастака знаходзяцца ў Нацыянальным мастацкім музеі Рэспублікі Беларусь, фондах Беларускага саюза мастакоў^[3].