Віталь Іванавіч Еўмянькоў

Віталь Іванавіч Еўмянькоў (5 чэрвеня 1976, Магілёў — 25 снежня 2022, Магілёў) — беларускі літаратуразнаўца, пісьменнік, журналіст. Кандыдат філалагічных навук (2006).

Віталь Іванавіч Еўмянькоў
Дата нараджэння	5 чэрвеня 1976(1976-06-05)
Месца нараджэння	Магілёў, Магілёўская вобласць, Беларуская ССР, СССР
Дата смерці	25 снежня 2022(2022-12-25) (46 гадоў)
Месца смерці	Магілёў, Магілёўская вобласць, Беларусь
Месца пахавання	Магілёў
Род дзейнасці	літаратуразнавец, пісьменнік, выкладчык, журналіст
Месца працы	МДУ імя А. А. Куляшова
Навуковая ступень	кандыдат філалагічных навук
Альма-матар	МДУ імя А. А. Куляшова
Член у	Саюз беларускіх пісьменнікаў

Жыццяпіс

Скончыў МДУ. Служыў у арміі. З 1999 года выкладаў у МДУ. Абараніў дысертацыю па тэме «Адам Міцкевіч і духоўна-эстэтычныя пошукі ў літаратуры Беларусі XIX ст.». Працаваў на кафедры літаратуры і міжкультурных камунікацый. Гаварыў па-беларуску.

Выкладаў журналістыку. Рэдагаваў сайт city.mogilev.by і гарадскі партал mycity.by (2009—2012).

Сябра Саюза беларускіх пісьменнікаў.

Вясной 2021 звольнены з універсітэта па палітычных матывах (адначасова з Аляксандрам Агеевым і Ігарам Шарухам).

Памёр пасля працяглай хваробы 25 снежня 2022 года ў Магілёве^[1]. Пахаваны ў Магілёве^[2].

Творчасць і навуковая дзейнасць

Друкаваўся ў магілёўскім гадавіку «Брама» і часопісе «Маладосць». Перакладаў з польскай мовы. Аўтар аповесці «Успаміны Ваяводы, або Пялёсткі белай ружы» (Мінск, 2008), паэмаў «Хоцімская вайна» і «Філаматы»^[2].

Даследаваў гісторыю беларускай літаратуры, асабліва часу Рэчы Паспалітай. Аўтар манаграфій «Адам Міцкевіч і духоўна-эстэтычныя пошукі ў літаратуры Беларусі XIX ст.» (Магілёў, 2009) і «Навіны „краёвыя“ і замежныя ў польскамоўных выданнях другой паловы XVI — першай чвэрці XVII ст. „Меркурый ардынарыйны“ (спроба апісання і верыфікацыі гістарычных крыніц)» (Магілёў, 2016), вучэбна-метадычны дапаможнік «Літаратурнае рэдагаванне і кнігавыданне на тэрыторыі Беларусі» (Магілёў, 2012—2014). Напісаў больш як 100 навуковых артыкулаў^[2].