Жыццё беларуса

«Жыццё беларуса» — газета на беларускай мове, якая выдавалася ў Вільні; першы нумар выйшаў 19 жніўня 1925 года. Выходзіла 3 разы на тыдзень, апошні нумар выдадзены 12 лістапада 1925 (агулам выдана 20 нумароў, з іх 5 канфіскаваныя). Газета закрытая з-за ўціску польскіх уладаў^[1]. Першая газета, якая выдавалася ад імя Беларускай сялянска-работніцкай грамады. Рэдактары — Язэп Туркевіч, Уладзімір Варава (з № 8 за 3 кастрычніка 1925).

«Жыццё беларуса»
Тып	газета
Рэдактар	Язэп Туркевіч, Уладзімір Варава
Заснавана	19 жніўня 1925
Спыненне публікацый	12 лістапада 1925
Палітычная прыналежнасць	Беларуская сялянска-работніцкая грамада
Мова	беларуская
Галоўны офіс	Вільня, Віленская вул. п. 6 (Wilenska 12, m. 6).
Медыяфайлы на Вікісховішчы

Выступала ў абарону правоў беларусаў, у тым ліку права на родную мову. Інфармавала пра страйк у Крынках, барацьбу з камуністамі на Беласточчыне, беларускі грамадска-культурніцкі рух у Літве і Латвіі. Сярод змяшчаных у газеце матэрыялаў — прамовы з трыбуны польскага Сойма беларускіх дэпутатаў А. Станкевіча, Ф. Ярэміча, нарыс А. Луцкевіча пра гісторыю нацыянальнага беларускага мастацтва, літаратурныя творы Я. Купалы, Ц. Гартнага, У. Сыча.