Завіруха (песня)

«Завіруха» — папулярная беларускамоўная песня кампазітара Эдуарда Ханка на верш «Снежная імпрэсія» Генадзя Бураўкіна^[1][2]. Вядомая ў выкананні вакальна-інструментальнага ансамбля «Верасы», а пасля — дуэта Аляксандра Ціхановіча і Ядвігі Паплаўскай.

Завіруха
Сінгл Верасы
Выпушчаны	1982
Мова	беларуская
Жанр	Поп
Кампазітар	Эдуард Сямёнавіч Ханок
Аўтары песні	Эдуард Ханок, Генадзь Бураўкін

Гісторыя

Упершыню прагучала на Цэнтральным тэлебачанні у 1982 годзе. Паводле некаторых крыніц мелодыя нарадзілася ўзімку, калі Ханок ехаў з кніжкай Бураўкіна ў аўтобусе «Брэст — Мінск»^[3]. Аднак сам Ханок прыгадваў, што мелодыя нарадзілася ў Мінску^[4]:

«Памятаю, ехаў з Філармоніі ў Тэатр музкамедыі, на вуліцы была завіруха, на каленях ляжаў аркуш з вершамі Бураўкіна. Так і нарадзілася мелодыя».

У красавіку 2017 года Эдуард Ханок забараніў, у сувязі з непавагай да яго асобы і грубымі парушэннямі яго аўтарскіх правоў^[5], дуэту Ціхановіча (памёр у канцы студзеня таго ж года) і Паплаўскай выконваць песні «Завіруха», «Счастливый случай», «Я у бабушки живу» і «Малиновки заслыша голосок»^[6]. Па словах Паплаўскай, Ханок запатрабаваў ад яе 25 000 долараў выплат за выкарыстанне яго песень, прыгразіўшы судом^[7].

Новы ўсплёск папулярнасці песня набыла ў канцы 2023 года, калі беларускі гурт NaviBand запісаў 30-секундны кавер на яе, які завірусіўся ў TikTok^[8][9].