Зябкаўскі сельсавет

Зя́бкаўскі сельсавет — адміністрацыйна-тэрытарыяльная адзінка ў складзе Глыбоцкага раёна Віцебскай вобласці Беларусі. Адміністрацыйны цэнтр — вёска Зябкі.

Зябкаўскі сельсавет
Краіна	Беларусь
Уваходзіць у	Глыбоцкі раён
Уключае	33 населеныя пункты
Адміністрацыйны цэнтр	Зябкі
Дата ўтварэння	16 ліпеня 1954
Насельніцтва	▼641 чал. (2019)
Часавы пояс	UTC+03:00
Код аўтам. нумароў	2
Афіцыйны сайт

Гісторыя

Утвораны 16 ліпеня 1954 года ў складзе Пліскага раёна Вілейскай вобласці БССР шляхам аб’яднання скасаваных Асінаўскага і Міцькаўскага сельсаветаў^[1]. 24 красавіка 1959 года ў склад Псуеўскага сельсавета перададзены 11 населеных пунктаў (Асінаўка, Гарані, Гразі, Дзіўнікі, Завулак Літоўскі, Завулак Рускі, Скрабатуны, Сшо, Церасполле, Хралы і Янова)^[2]. З 20 студзеня 1960 года ў складзе Віцебскай вобласці. З 25 снежня 1962 года пасля скасавання Пліскага раёна сельсавет увайшоў у склад Глыбоцкага раёна. 3 ліпеня 1970 года ў склад сельсавета з Псуеўскага сельсавета перададзены 20 населеных пунктаў (вёскі Баравое, Барыскавічы, Гарохаўе, Дворыца, Крывічы, Прошкава, Прудаўё, Юркава і хутары Азёркі, Вусце, Выгары, Дварэц, Купелі, Малы Бор, Падавуты, Старына, Старыца, Хвашчова, Цагельня і Шабаны), наўзамен у склад Псуеўскага сельсавета перададзены 14 населеных пунктаў (вёскі Бабуліна, Васькавічы, Запалле, Ляпейкі, Чашкі і хутары Баяры, Бондары, Гаравыя, Гваздова, Каменкі, Карчомнае, Лаза, Паўлаўшчына, Целяшы)^[3]. 19 мая 1972 года ў склад Празароцкага сельсавета перададзены 26 населеных пунктаў (вёскі Ананічы, Багушэвічы, Барсукі, Замхава, Ласі, Лісіцы-I, Сахнавічы, Шчаўкуны і хутары Бабічы, Зароўе, Іосіфаўшчына, Курачына, Кучыншчына, Лапезы, Ластавікі, Лісіцы-II, Мазурава-I, Мазурава-II, Міцькі, Павіншчына, Пруднікава, Рамашкі-I, Рамашкі-II, Рослева, Станулева, Угрова)^[4]. На 1 студзеня 1974 года ў складзе сельсавета 47 населеных пунктаў^[5]. 27 верасня 2007 года скасаваны хутары Караткевічы і Пяскі^[6], 28 сакавіка 2011 года — хутары Дужкі і Старыца^[7].

24 красавіка 2025 года на тэрыторыі Зябкаўскага сельсавета ўтвораны хутар Ізумрудны^[8].

Насельніцтва

Насельніцтва сельсавета паводле перапісу 2009 года — 981 чалавек^[9], з іх 88,6 % — беларусы, 8,0 % — палякі, 2,3 % — рускія^[10]; паводле перапісу 2019 года — 641 чалавек^[11].

У 2021 годзе ў сельсавеце пражывала 688 чал.^[12]

Інфраструктура

Да 2016 года працавала некалькі ўстаноў адукацыі.

Станам на 2021 год на тэрыторыі сельсавета працавалі: сельскагаспадарчы філіял «Прошкава», кар’ер «Баравое» ВРУП «Наваполацкжалезабетон», Прошкаўскае лясніцтва Глыбоцкага вопытнага лясгаса, дзіцячы лагер «Ізумрудны» і дзве чыгуначныя станцыі (Зябкі і Баравое)^[12].

Старшыні сельсавета

• Ігар Іванавіч Ціманоўскі (2011 — цяперашні час)^[12]