Капліца-пахавальня Скірмунтаў (Моладава)

Капліца-пахавальня Скірмунтаў — помнік архітэктуры неакласіцызму ў в. Моладава (Іванаўскі раён) пры галоўным уездзе ў сядзібна-паркавы комплекс Скірмунтаў (не захаваўся).

Капліца-пахавальня
Капліца-пахавальня Скірмунтаў
52°17′30,5″ пн. ш. 25°41′23,86″ у. д.HGЯO
Краіна	Беларусь
Вёска	Моладава
Архітэктурны стыль	неакласіцызм
Архітэктар	Тадэвуш Раствароўскі
Заснавальнік	Генрых Аляксандравіч Скірмунт
Будаўніцтва	1905—1908 гады
Статус	Гісторыка-культурная каштоўнасць Беларусі, шыфр 112Г000270шыфр 112Г000270
Стан	Занядбана
Медыяфайлы на Вікісховішчы

Пабудавана ў 1905—1908 паводле праекта віленскага архітэктара Тадэвуша Раствароўскага. У савецкія часы ў капліцы размяшчаўся склад трактарных запчастак.

Архітэктура

Капліца-пахавальня, фота 1937 г.

Мураваны цэнтрычны храм-ратонда дыяметрам 8 м завершаны сферычным купалам. Ніжэйшая за астатні аб'ём прамавугольная, раскрапаваная пілястрамі апсіда і дарычныя порцікі з трох бакоў надаюць плану крыжападобную форму. Уваходы порцік чатырохкалонны, астатнія — дзвюхкалонныя. Апрацаваны гарызантальным рустам цыліндрычны аб'ём завершаны шырокім фрызам з поясам ляпных гірлянд і карнізам з сухарыкамі і мадульёнамі. Тымпаны франтонаў і ліштвы акон, якія мелі калісьці каляровыя вітражы, аздоблены ляпным раслінным арнаментам. У інтэр'еры сцены рытмічна раскрапаваныя пілястрамі і завершаны па перыметры карнізам.

У алтары была ўстаноўлена беламармуровая скульптура Хрыста, створаная скульптарам Броцкім (не захавалася). Аздабленне інтэр'ера не збераглося.

Літаратура

• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, [1984—1988].
• Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5.
• Моладаўская капліца // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 500. — 800 с. — 5 000 экз. — ISBN 985-11-0026-9.

Спасылкі

Аб’ект Дзяржаўнага спіса гісторыка-культурных каштоўнасцей Рэспублікі Беларусь, шыфр 112Г000270

• На Вікісховішчы ёсць медыяфайлы па тэме Капліца-пахавальня Скірмунтаў (Моладава)
• Капліца-пахавальня Скірмунтаў (Моладава) на сайце Radzima.org
• Капліца-пахавальня Скірмунтаў (Моладава) на сайце Глобус Беларусі (руск.)