Лідзія Львоўна Арабей

Лідзія Львоўна Арабе́й (27 чэрвеня 1925, в. Нізок, Уздзенскі раён — 20 лютага 2015, Мінск) — беларуская пісьменніца і літаратуразнавец, кандыдат філалагічных навук (1958)^[1].

Лідзія Львоўна Арабей
Асабістыя звесткі
Дата нараджэння	27 чэрвеня 1925(1925-06-27)
Месца нараджэння	Нізок, Уздзенскі раён, Менская акруга, Беларуская ССР, СССР
Дата смерці	20 лютага 2015(2015-02-20) (89 гадоў)
Месца смерці	Мінск, Беларусь
Пахаванне	Паўночныя могілкі
Грамадзянства	СССР  Беларусь
Муж	Яўген Маркавіч Ганкін
Альма-матар	філалагічны факультэт БДУ
Месца працы	Чырвоны сцяг[d] Вожык Чырвоная змена Беларусь Полымя
Прафесійная дзейнасць
Род дзейнасці	літаратуразнаўца, перакладчыца, пісьменніца
Мова твораў	беларуская
Грамадская дзейнасць
Член у	Саюз беларускіх пісьменнікаў

У Вікіпедыі ёсць артыкулы пра іншых людзей з прозвішчам Арабей.

Біяграфія

Нарадзілася ў сям'і службоўцаў. У 1942—1944 жыла ў Шчучыне. З 1944 — супрацоўнік рэдакцыі шчучынскай раённай газеты «Чырвоны сцяг». З 1945 жыве ў Мінску. Працавала ў часопісе «Вожык», у рэдакцыі газеты «Чырвоная змена», настаўнічала. Скончыла ў 1951 годзе філалагічны факультэт БДУ^[1], у 1954 годзе аспірантуру пры Інстытуце літаратуры і мастацтва АН БССР. Была старшым рэдактарам выдавецтва «Беларусь» (1955—1967)^[1], літсупрацоўнікам часопіса «Полымя» (1967—1974)^[1]. Кандыдат філалагічных навук, дысертацыя была прысвечана жыццю і творчасці А. Пашкевіч (Цёткі).

Член Саюза пісьменнікаў Беларусі з 1958 года^[2].

Памерла 20 лютага 2015 года ў Мінску. Пахаваная на Паўночных могілках Мінска (калумбарый)^[2].

Творчасць

Літаратурную працу пачала ў 1945. Выступала як празаік, крытык, літаратуразнавец. У 1956 выдала даследаванне «Цётка (Алаіза Пашкевіч)»^[1], а ў 1959 «Фядос Шынклер»^[1], аўтар зборнікаў аповесцяў і апавяданняў «Калібры» (1960, апавяданні для дзяцей), «Кватэра № 3» (1961, кніга сатыры і гумару), «Мера часу» (1962), «Экзамен» (1963), «Ларыса» (1964), «На струнах буры» (1967), «Сярод ночы» (1968), «Іскры ў папялішчы» (1970), «Ваўчкі» (1972), «Сіні бор» (1972, аповесць), «Мне трэба ехаць» (1974), «Стану песняй» (1977), «Сузор'е Вялікай Мядзведзіцы» (1980), «Паласа дажджу» (1984), «Пошукі кахання» (1987), «Ісці ў разведку» (1989, апавяданні для дзяцей), «Пошукi iсцiны» (абразкі, 2005), «На полымі любві» (даследаванне, прысвечанае Алаізе Пашкевіч (Цётцы), 2006), «Белае поле» (апавяданні, ўспаміны, 2008).

Выйшлі Выбраныя творы ў 2-х тамах (1985).

Пераклала раман эстонскага пісьменніка А. Хінта «Бераг вятроў» (з А. Раманоўскай, 1960).

Зноскі

1. Арабей Лідзія Львоўна // Біяграфічны даведнік. — Мн.: «Беларуская Савецкая энцыклапедыя» імя П. Броўкі, 1981. — Т. 5. — С. 33. — 720 с..
2. Аблажэй — Брыль – Белліт  (бел.) (14 ліпеня 2023). Праверана 18 ліпеня 2024.