Ліпініцкі сельсавет

Лі́пініцкі сельсавет — адміністрацыйна-тэрытарыяльная адзінка ў складзе Буда-Кашалёўскага раёна Гомельскай вобласці Беларусі. Адміністрацыйны цэнтр — вёска Ліпінічы.

Ліпініцкі сельсавет
Краіна	Беларусь
Статус	сельсавет
Уваходзіць у	Буда-Кашалёўскі раён
Уключае	19 населеных пунктаў
Адміністрацыйны цэнтр	Ліпінічы
Дата ўтварэння	20 жніўня 1924
Насельніцтва (2019)	1 308
Часавы пояс	UTC+03:00
Код аўтам. нумароў	3
Афіцыйны сайт

Гісторыя

Утвораны 20 жніўня 1924 года ў складзе Буда-Кашалёўскага раёна Бабруйскай акругі БССР. З 27 кастрычніка 1927 года ў складзе Гомельскай акругі. Пасля скасавання акруговай сістэмы 26 ліпеня 1930 года ў Буда-Кашалёўскім раёне БССР. З 20 лютага 1938 года ў складзе Гомельскай вобласці. 13 лютага 1958 года ў склад сельсавета з Буда-Люшаўскага сельсавета перададзены 4 населеныя пункты (Дубраўка, Люшаў, Негаўка і Салтанаўка)^[1]. 26 чэрвеня 1969 года скасаваны пасёлак Пад’ясень^[2]. На 1 студзеня 1974 года ў складзе Ліпініцкага сельсавета 21 населены пункт^[3]. 4 лістапада 1982 года скасаваны пасёлак Пяцідворка^[4], у 1989 годзе — пасёлак Барок^[5]. 1 снежня 2009 года да сельсавета далучана тэрыторыя скасаванага Будалюшаўскага сельсавета (9 населеных пунктаў: вёскі Буда Люшаўская, Любавін, Новы Любавін, Слабада Люшаўская, Хмяльное, Шутнае і пасёлкі Зарэчча, Перагрузачны, Рошча)^[6].

Склад

У склад Ліпініцкага сельсавета ўваходзілі населеныя пункты, якія зараз не існуюць: да 1969 года — пасёлак Пад’ясень, да 1982 года — пасёлак Пяцідворка, да 1989 года — пасёлак Барок, да 1997 года — пасёлкі Дубраўка і Зялёная Рошча.

Насельніцтва

Насельніцтва сельсавета паводле перапісу 2009 года (10 населеных пунктаў) — 947 чалавек^[7], з іх 96,1 % — беларусы, 1,6 % — рускія, 1,2 % — украінцы, 1,1 % — армяне^[8]; паводле перапісу 2019 года (19 населеных пунктаў) — 1308 чалавек^[9].

Вядомыя асобы

• Антон Ігнатавіч Казлоўскі (1899—1972) — вучоны ў галіне селекцыі сельскагаспадарчых раслін, доктар сельскагаспадарчых навук, прафесар^[10];
• Аляксей Сцяпанавіч Кейзараў (4.10.1928 — 22.11.1994) — беларускі пісьменнік^[11];
• Валянціна Міхайлаўна Крыловіч (нар. 1951) — заслужаная артыстка БССР (1988);
• Мікалай Мікалаевіч Чарняўскі (нар. 1943) — беларускі паэт^[11].