Маладая Беларусь (часопіс)

У паняцця ёсць і іншыя значэнні, гл. Маладая Беларусь (значэнні).

«Маладая Беларусь» — заходнебеларускі літаратурна-грамадска-навуковы часопіс. Выдадзены 1 нумар у 1936 годзе ў Вільні на беларускай мове. Рэдактар — В. Тумаш. Меў на мэце кансалідацыю маладых літаратурных і навуковых сіл на грунце нацыянальнай ідэі^[1].

«Маладая Беларусь»
Тып	літаратурны часопіс[d], грамадскі часопіс[d] і навуковы часопіс[d]
Краіна	Польская Рэспубліка
Рэдактар	Вітаўт Тумаш
Заснавана	1936
Спыненне публікацый	1936
Мова	беларуская
Галоўны офіс	Вільня

Часопіс вітаў намаганні Таварыства беларускай школы, Беларускага інстытута гаспадаркі і культуры і іншых арганізацый у барацьбе за беларускую школу, прааналізаваў стан і задачы нацыянальна-вызвольнага руху ў Заходняй Беларусі (артыкулы «Інтэлігенцыя ў беларускім культурна-грамадскім жыцці» М. Шкялёнка, «Ці існуе крызіс беларускага руху?» В. Грышкевіча)^[1].

Пазнаёміў з гісторыяй беларускіх летапісаў, у тым ліку з уключанымі ў іх структуру аповесцямі і апавяданнямі (Я. Станкевіч), зрабіў агляд творчасці кампазітара К. Галкоўскага (артыкул «Мастацкая песня ў Заходняй Беларусі» Р. Шырмы), беларускай савецкай паэзіі 1920-х гадоў (С. Станкевіч)^[1].

На яго старонках змешчаны творы М. Танка, М. Машары, М. Васілька, Х. Ільяшэвіча, П. Галавача, А. Александровіч. У хроніцы «З культурнага жыцця» асветлены падзеі беларускай культуры ў Заходняй і Савецкай Беларусі^[1].

Спыніў існаванне з-за слабой матэрыяльнай базы і ідэйных рознагалоссяў паміж выдаўцамі^[1].