Мярэя

Мярэ́я — рака ў Горацкім раёне Магілёўскай вобласці і Дубровенскім раёне Віцебскай вобласці Беларусі і на мяжы са Смаленскай вобласцю Расіі, левы прыток Дняпра.

Мярэя
Характарыстыка
Даўжыня	56 км
Басейн	694 км²
Расход вады	каля 4 м³/с
Вадацёк
Выток
• Каардынаты	54°25′26″ пн. ш. 31°11′56″ у. д.HGЯO
Вусце	Дняпро
• Каардынаты	54°39′57″ пн. ш. 31°11′13″ у. д.HGЯO
Размяшчэнне
Водная сістэма	Дняпро → Чорнае мора
Краіна	Беларусь
Рэгіёны	Магілёўская вобласць, Віцебская вобласць
Раёны	Горацкі раён, Дубровенскі раён
Код у ДВР	04010000312105000008520
выток вусце
Медыяфайлы на Вікісховішчы

Назва

Паводле Ул. Тапарова, адпачатны выгляд назвы *Merēja, або з пазнейшым утваральнікам ад балцкай назвы тыпу літоўскага гідроніма Mera^[1]. У назве Мярэя балцкі гідранімічны пашыральнік -ej-, як у падняпроўскіх балцкіх гідронімах *Vedēja, *Rupēja^[2].

Беларускі географ В. Жучкевіч бачыў сувязь з назвай фінскай народнасці мера^[3]. На думку А. Рогалева, назва Мярэя ўтрымоўвае старажытны інтэрнацыянальны корань мер-, мёр-, мір-, мар-, мор- з абагульненым значэннем «водны аб'ект», «вада»^[4].

Водаапісанне

Даўжыня ракі 56 км, з іх 24 км у Беларусі. Плошча вадазбору 694 км². Вадазбор у межах Смаленскага ўзвышша. Расход вады ў вусці складае каля 4 м³/с.

Бярэ пачатак за 2 км у напрамку на ўсход ад вёскі Стараселле Горацкага раёна, вусце ў Дубровенскім раёне каля вёскі Александрыя. Даліна трапецападобная. Абалона двухбаковая, рэчышча звілістае, шырыня ракі ў межань 3—6 м. На рацэ каля аграгарадка Леніна знаходзіцца вадасховішча.

Сярод прытокаў — рэкі Закабыліца, Ірвяні́ца^[5], Івата, Рэкта, Свіная, Лупа.

Пачынаючы ад вёскі Баева Дубровенскага раёна і да самага вусця, па рацэ Мярэя праходзіць дзяржаўная мяжа паміж Беларуссю і Расійскай Федэрацыяй.