Нацыянальны статыстычны камітэт Рэспублікі Беларусь

Нацыянальны статыстычны камітэт Рэспублікі Беларусь (Белстат) — рэспубліканскі орган дзяржаўнага кіравання ў галіне дзяржаўнай статыстыкі, праводзіць дзяржаўную палітыку ў галіне дзяржаўнай статыстыкі, ажыццяўляе рэгуляванне і кіраванне, а таксама каардынацыю дзейнасці іншых дзяржаўных органаў, іншых арганізацый у гэтай галіне.

Нацыянальны статыстычны камітэт Рэспублікі Беларусь
скарочана — Белстат
Геральдычны знак — эмблема Нацыянальнага статыстычнага камітэта Рэспублікі Беларусь
Агульная інфармацыя
Краіна	Рэспубліка Беларусь
Юрысдыкцыя	Беларусь
Дата стварэння	26 жніўня 2008
Папярэдняе ведамства	Міністэрства статыстыкі і аналізу Рэспублікі Беларусь
Кіраўніцтва дзейнасцю ажыццяўляе	Прэзідэнт Рэспублікі Беларусь
Штаб-кватэра	220034, Мінск, Партызанскі пр-т, д. 12
Старшыня	Іна Мядзведзева
Сайт	belstat.gov.by

Белстат падпарадкоўваецца непасрэдна Прэзідэнту Рэспублікі Беларусь.

З 29 снежня 2014 года пасаду старшыні камітэта займае Іна Мядзведзева.

Гісторыя

Указам Прэзідыума Вярхоўнага Савета БССР ад 12 жніўня 1987 № 1652-1 Цэнтральнае статыстычнае ўпраўленне БССР пераўтворана ў саюзна-рэспубліканскі Дзяржаўны камітэт Беларускай ССР па статыстыцы. Пастановай Вярхоўнага Савета БССР ад 18 ліпеня 1990 г. Дзяржаўны камітэт БССР па статыстыцы перайменаваны ў Дзяржаўны камітэт БССР па статыстыцы і аналізе, у 1991 — у Дзяржаўны камітэт Рэспублікі Беларусь па статыстыцы і аналізе.

Указам Прэзідэнта Рэспублікі Беларусь ад 23 верасня 1994 года Дзяржаўны камітэт Рэспублікі Беларусь па статыстыцы і аналізе пераўтвораны ў Міністэрства статыстыкі і аналізу Рэспублікі Беларусь.

Указам Прэзідэнта Рэспублікі Беларусь ад 26 жніўня 2008 г. № 445 Міністэрства статыстыкі і аналізу Рэспублікі Беларусь пераўтворана ў Нацыянальны статыстычны камітэт Рэспублікі Беларусь. Дадзенае пераўтварэнне выклікана неабходнасцю захавання аднаго з асноўных прынцыпаў афіцыйнай статыстыкі, замацаванага ў Законе Рэспублікі Беларусь «Аб дзяржаўнай статыстыцы» — прынцыпу незалежнасці пры ажыццяўленні дзяржаўнай статыстычнай дзейнасці.

За 2017 год Нацыянальны статыстычны камітэт Рэспублікі Беларусь склаў звыш 2 000 000 справаздач. На кастрычнік 2018 года Нацстаткам Беларусі налічваў звыш 1500 супрацоўнікаў^[1], з іх 93 % складалі жанчыны^[2].

Структура

Сістэму Белстата складаюць:

• Цэнтральны апарат Белстата:
  • Галоўнае ўпраўленне каардынацыі і развіцця статыстычнай сістэмы
  • Галоўнае ўпраўленне комплексных інфармацыйна-аналітычных работ
  • Галоўнае ўпраўленне нацыянальных рахункаў
  • Галоўнае ўпраўленне статыстыкі прадпрыемстваў
  • Галоўнае ўпраўленне статыстыкі сельскай гаспадаркі і навакольнага асяроддзя
  • Галоўнае ўпраўленне статыстыкі інвестыцый і будаўніцтва
  • Галоўнае ўпраўленне статыстыкі знешняга гандлю
  • Галоўнае ўпраўленне статыстыкі цэн
  • Галоўнае ўпраўленне статыстыкі фінансаў
  • Галоўнае ўпраўленне статыстыкі паслуг і ўнутранага гандлю
  • Аддзел статыстыкі транспарту і інфармацыйна-камунікацыйных тэхналогій
  • Упраўленне дэмаграфічнай статыстыкі
  • Упраўленне статыстыкі працы
  • Упраўленне статыстыкі ўзроўню жыцця насельніцтва і абследаванняў хатніх гаспадарак
  • Упраўленне статыстычных класіфікацый
  • Упраўленне статыстычнага рэгістра
  • Упраўленне міжнароднага супрацоўніцтва і распаўсюджвання статыстычнай інфармацыі
  • Галоўнае ўпраўленне развіцця інфармацыйных сістэм
  • Галоўнае ўпраўленне фінансава-эканамічнай працы
  • Упраўленне кантролю і справаводства
  • Упраўленне бухгалтарскага ўліку і кантролю
  • Юрыдычнае упраўленне
  • Упраўленне па рабоце з персаналам
• Упраўленні Белстата па абласцях і горадзе Мінску;
• Дзяржаўныя арганізацыі, падпарадкаваныя Белстату:
  • Рэспубліканскае ўнітарнае прадпрыемства «Інфармацыйна-вылічальны цэнтр Нацыянальнага статыстычнага камітэта Рэспублікі Беларусь»
  • Рэспубліканскае ўнітарнае прадпрыемства «Цэнтр інфармацыйных тэхналогій Нацыянальнага статыстычнага камітэта Рэспублікі Беларусь»

Задачы

Асноўнымі задачамі Белстата з’яўляюцца:

• фармаванне навукова абгрунтаванай афіцыйнай статыстычнай метадалогіі, якая адпавядае міжнародным стандартам у галіне статыстыкі;
• ажыццяўленне дзяржаўнай статыстычнай дзейнасці з захаваннем прынцыпаў дзяржаўнай статыстыкі;
• задавальненне патрэбы грамадства, дзяржавы і міжнароднай супольнасці ў афіцыйнай статыстычнай інфармацыі.

Паўнамоцтвы

Згодна з уставам ведамства мае паўнамоцтвы на:

• атрыманне ад устаноў звестак для вядзення падлікаў і стварэння зводаў даных;
• атрыманне звестак з Адзінага дзяржаўнага рэгістру юрыдычных асоб і індывідуальных прадпрымальнікаў і іншых баз даных дзяржаўных устаноў;
• прыцягненне асоб да падліковых назіранняў;
• бясплатнае атрыманне ад асоб першасных падліковых звестак у запатрабаваным аб’ёме і ў тэрмін;
• бясплатнае атрыманне ад упаўнаважаных на вядзенне падлікаў устаноў зводных звестак аб праведзеных назіраннях;
• спраўджанне першасных звестак шляхам супастаўлення са звесткамі першасных уліковых дакументаў;
• атрыманне тлумачэнняў пры выяўленні скажэнняў справаздач аб падліках;
• выданне загадаў аб выпраўленні выяўленых скажэнняў справаздач;
• ухваленне ведамасных пастаноў;
• прыцягненне для распрацоўкі прыёмаў падліку навукова-даследніцкіх устаноў, навукоўцаў і спецыялістаў;
• тлумачэнне вядзення дзяржаўных падлікаў у сродках масавай інфармацыі;
• супрацу з адпаведнымі ведамствамі іншых дзяржаў і міжнароднымі арганізацыямі;
• распаўсюд зводных звестак аб падліках за плату;
• стварэнне і вядзенне спіса падлікаў;
• стварэнне, пераўтварэнне, скасаванне і ўхваленне ўставаў падпарадкаваных устаноў^[3].