Няманя Відзіч

У Вікіпедыі ёсць артыкулы пра іншых людзей з прозвішчам Відзіч.

Няманя Відзіч (сербск.: Немања Видић; нар. 21 кастрычніка 1981, Ужыцэ, Югаславія) — сербскі футбаліст, абаронца. Ігрок нацыянальнай зборнай Сербіі (2006—2011). Перш за ўсё вядомы па выступам за англійскі «Манчэстэр Юнайтэд», капітанам якога пэўны час з’яўляўся.

Няманя Відзіч
Агульная інфармацыя
Мянушка	Віда
Нарадзіўся	21 кастрычніка 1981(1981-10-21)[1][2] (43 гады) Ужыцэ, абшчына Ужыцэ[d], Цітава-Ужыцэ[d], Сацыялістычная Рэспубліка Сербія, СФРЮ
Грамадзянства	Сербія
Рост	190 кг
Вага	88 см
Пазіцыя	цэнтральны абаронца
Маладзёжныя клубы
1989—1993 Адзінства (Ужыцэ) 1994—1996 Слабада (Ужыцэ) 1996—2000 Црвена Звезда
Клубная кар’ера[* 1]
2000—2004 Црвена Звезда 67 (12) 2000—2001 →  Спартак (Субаціца) 27 (6) 2004—2006 Спартак (Масква) 39 (4) 2006—2014 Манчэстэр Юнайтэд 211 (15) 2014—2016 Інтэрнацыянале 23 (1)
Нацыянальная зборная[* 2]
2002 Югаславія 3 (0) 2002—2006 Сербія і Чарнагорыя 17 (1) 2006—2011 Сербія 36 (1)
Колькасць гульняў і галоў за прафесійны клуб лічыцца толькі для розных ліг нацыянальных чэмпіянатаў, адкарэктавана станам на 30 студзеня 2016. Колькасць гульняў і галоў за нацыянальную зборную ў афіцыйных матчах
Медыяфайлы на Вікісховішчы

Біяграфія

Няманя Відзіч нарадзіўся ў сям’і Драгалюба, былога працаўніка меднай фабрыкі, і Зоры, якая працавала ў банку. Ён пачаў займацца футболам ва ўзросце 7 гадоў. Разам са сваім старэйшым братам Душанам Няманя трэніраваўся ў мясцовым клубе «Адзінства». Відзіч хутка прагрэсаваў, і ўжо ва ўзросце 12 гадоў перайшоў у іншы клуб, «Слабада».

Таленавітага іграка запрыкмецілі скаўты «Црвены Звезды», якая запрасіла абаронцу да сябе. Незадоўга да свайго 15 года нараджэння, Відзіч падпісаў моладзевы кантракт з «Црвенай Звездай». З 2000 года ён пачаў выступаць на прафесійным узроўні, правёўшы сезон 2000/01 у арэндзе ў клубе «Спартак» з Субаціцы. Ужо ў наступным сезоне ён вярнуўся ў «Црвену Звезду», у якой хутка заваяваў месца ў аснове і пачаў рэгулярна выступаць у чэмпіянаце Югаславіі. У сезоне 2001/02 Відзіч стаў уладальнікам Кубка Югаславіі^[3], а праз некаторы час быў абраны капітанам клуба.

У ліпені 2004 года Відзіч перайшоў у клуб расійскай Прэм’ер-лігі «Спартак». Сума трансферу не выкрывалася, аднак, паводле некаторых крыніц, Відзіч стаў самым дарагім абаронцам у гісторыі РФПЛ на той момант.

Пасля 1,5 сезонаў у маскоўскім «Спартаку» Відзіч перайшоў у клуб англійскай Прэм’ер-лігі «Манчэстэр Юнайтэд». «Юнайтэд» выяўляў цікавасць да таленавітага сербскага абаронцы яшчэ з лета 2003 года^[4], але трансфер адбыўся толькі праз два з паловай гады, 5 студзеня 2006 года. Сума пераходу, як паведамляецца, склала каля 7 млн фунтаў.

У сезоне 2006/07 Відзіч трывала заваяваў месца ў аснове каманды, сфарміраваўшы ў цэнтры абароны магутную звязку з Рыа Фердынандам, якая стала ў далейшым адной з наймацнейшых у англійскім футболе^[5]. Свой першы гол за «Юнайтэд» Відзіч забіў 14 кастрычніка 2006 года ў матчы супраць «Уігана», які «чырвоныя д’яблы» выйгралі з лікам 3:1^[6]. 4 лістапада Відзіч зноў адзначыўся голам, на гэты раз у браму «Портсмута». 8 лістапада 2007 года Няманя падпісаў новы кантракт з клубам, падоўжыўшы яго на два гады, да 2012 года^[7]. У лютым 2011 года Відзіч стаў капітанам каманды, пасля таго як Гары Невіл скончыў сваю кар’еру. У сезоне 2010/11 абаронца быў абраны найлепшым іграком Прэм’ер-лігі. У снежні 2011 года ў матчы супраць «Базеля» Відзіч атрымаў разрыў звязак калена і выбыў на паўгода^[8]. Ігрок вярнуўся на поле ў жніўні 2012 года, але затым зноў выбыў на 2 месяцы з-за аперацыі на меніску калена правай нагі.

5 сакавіка 2014 года «Інтэрнацыянале» абвясціў пра тое, што Відзіч з сезону 2014/15 будзе выступаць за італьянскі клуб, пасля таго як у ліпені 2014 года скончыцца кантракт з «Юнайтэд»^[9]. Аднак, у «Інтэрнацыянале» не здолеў замацавацца ў аснове, а пасля прыходу на пасаду галоўнага трэнера Раберта Манчыні канчаткова асеў на лаўцы. 18 студзеня 2016 кантракт Відзіча з міланскім клубам быў разарваны^[10].

29 студзеня 2016 года абвясціў аб завяршэнні прафесійнай кар’еры^[11].

Асабістае жыццё

17 ліпеня 2006 года Відзіч ажаніўся з Ганнай Іванавіч, студэнткай факультэта эканомікі Бялградскага ўніверсітэта (не блытаць з аднайменнай сербскай тэнісісткай). У пары нарадзіўся сын Лука^[12]. 27 мая 2009 года ў пары нарадзіўся другі сын — Стэфан. Акрамя таго яны маюць трэцяга сына, якога клічуць Петарам.

Дасягненні

Црвена Звезда:

• Чэмпіён Сербіі і Чарнагорыі: 2004
• Уладальнік Кубка Югаславіі: 2002
• Уладальнік Кубка Сербіі і Чарнагорыі: 2004

Манчэстэр Юнайтэд:

• Чэмпіён Англіі (5): 2007, 2008, 2009, 2011, 2013
• Уладальнік Кубка Футбольнай Лігі (3): 2006, 2009, 2010
• Уладальнік Суперкубка Англіі (5): 2007, 2008, 2010, 2011, 2013
• Пераможца Лігі чэмпіёнаў: 2008
• Пераможца Клубнага чэмпіянату свету: 2008