Партрэт (фільм)

«Партрэ́т» — беларускі дакументальны кароткаметражны фільм, зняты рэжысёрам Вольгай Дашук на тэлеканале «Белсат» у 2017 годзе^[1].

Партрэт
Партрэт
Жанр	дакументальны фільм
Рэжысёр	Вольга Віктараўна Дашук
Кінакампанія	Белсат
Працягласць	25 хв.
Краіна	Беларусь
Мова	беларуская
Год	2017

Сюжэт

Незвычайны фільм. У ім мы бачым толькі твары. І яны толькі гавораць, найчасцей даводзячы нас да смеху ці да слёз^[1].

Здымачная група

• рэжысёр — Вольга Дашук

Кінематаграфічныя адметнасці

Форма аповеду, якую ўзяла ў аснову свайго фільма Вольга Дашук, увайшла ў класіку кінематографа, дзякуючы польскаму рэжысёру Кшыштафу Кеслёўскаму^[1]. Ягоны фільм «Гаворачыя галовы» выйшаў на экраны пры сацыялістычнай Польшчы — у 1980 годзе. Рознаўзроставым героям яго фільма задаваліся адныя і тыя ж тры пытанні: «Кім Вы з’яўляецеся?», «Што для Вас самае галоўнае?», «Чаго б Вы хацелі?»^[2][3]. У фільме Кеслёўскага было 44 героі, колькасць герояў у фільме Вольгі Дашук перавысіла 60^[1].

У інтэрв’ю рэжысёрка адзначала, што натхнялася фільмам польскага класіка, але тым не менш не мела на мэце дакладна скапіраваць яго:

Што датычыць формы, то мяне вельмі вабіла такая амбітная, амаль эксперыментальная задача. Хацелася свядома паспрабаваць такі архаічны, візуальна абмежаваны падыход у сучасных умовах, калі партатыўныя камеры ўмацоўваюцца на ўсё, што рухаецца, калі дроны лётаюць над усім, як мухі, і фіксуюць тое, што раней уцякала ад аб’ектыву. І вось, пры ўсім гэтым, узнікла жаданне зафіксаваць камеру на штатыве і паказаць толькі чалавечыя твары, якія гавораць і гавораць…[1]