Перакачаўнік

Перака́чаўнік — страва беларускіх татараў, пірог з вялікай колькасці пластоў тонка раскачанага цеста без дражджэй.

Перакачаўнік
Краіна паходжання	Турцыя  Польшча
Кампаненты
Асноўныя	ягняціна[d] цеста сметанковае масла
Падача
Тып стравы	асноўная страва[d]
Медыяфайлы на Вікісховішчы

20 ліпеня 2005 страва ўнесеная ў спіс традыцыйных страваў польскай кухні, які вядзе Міністэрства сельскай гаспадаркі Польшчы, гэты спіс мае толькі прэстыжны характар^[1]. Прадукт занесены таксама ў рэестр гарантаваных традыцыйных страваў  (англ.), які вядзе Еўрапейская камісія, што гарантуе яму абарону ва ўсім Еўрасаюзе^[2][3].

Рэцэпт

Інгрэдыенты

Цеста:

• мука — 1 кг
• масла — 250 г
• смятана — 1 шклянка
• яйкі — 3—4 шт.
• сода — 2 лыжкі
• соль
• цукар

Фарш мясны:

• фарш ялавічны ці барані — 1 кг
• цыбуля — 4 шт.
• соль
• перац
• молатая папрыка

Фарш салодкі:

• яблыкі, або тлусты тварог, або слівы, або сыр — 1 кг
• разынкі — 1 жменя
• цукар — 2 лыжкі
• сок з лімона
• алей для смажання ў фрытуры

З мукі, паловы масла, смятаны, яек, соды і цукру (для салодкай начынкі; але солі і перцу — у выпадку мясной начынкі) старанна замяшаць вельмі крутое — гэтак званае макароннае, з найменшай колькасцю вады (каля 25—35 % ад агульнай вагі цеста ці ўдвая менш, чым здольная звязаць пшанічная мука) — цеста, даліваючы пакрысе ваду па меры патрэбы. Падзяліць цеста на 4 часткі, кожную раскачаць у як мага больш тонкія пласты. Змяшаць кампаненты фаршу паміж сабой. Нашмараваць асобныя бліны маслам і закрасамі, выкласці фарш, зверху пакласці наступны блін і г. д. Скруціць у рулет, які затым звіваецца ў спіраль накшталт «слімака», зляпіць краі. Смажыць у рондлі ў вялікай колькасці алею (які мусіць цалкам пакрываць перакачаўнік), мясны — каля дзвюх гадзін, салодкі — крыху меней.

Чым больш далікатнымі атрымаюцца бліны і чым драбней пасечанае мяса, тым смачнейшым будзе гэты старадаўні беларуска‑татарскі пірог. Гатовы прадукт, паводле зарэгістраванага польскага стандарту, мае каля 30 см у дыяметры і важыць каля 3 кг.

Зноскі

1. Інфармацыя на старонцы Міністэрства сельскай гаспадаркі Польшчы Архівавана 16 лістапада 2008. (польск.)
2. Інфармацыя на старонцы Міністэрства сельскай гаспадаркі Польшчы(недаступная спасылка) (польск.)
3. Rozporządzenie Komisji (WE) NR 567/2009 z dnia 29 czerwca 2009 r. rejestrujące w rejestrze gwarantowanych tradycyjnych specjalności nazwę (Pierekaczewnik (GTS))(недаступная спасылка) (польск.)