Помнік Тадэвушу Касцюшку (Золатурн)

У паняцця ёсць і іншыя значэнні, гл. Помнік Тадэвушу Касцюшку.

Помнік Тадэвушу Касцюшку — статуя, усталяваная асацыяцыяй беларусаў у Швейцарыі ў швейцарскім горадзе Золатурне, з нагоды 200-годдзя з дня смерці Тадэвуша Касцюшкі.^[1] Помнік уяўляе сабой бронзавую постаць вышынёй 181 см.^[2] Знаходзіцца ў скверы ля пратэстанцкай царквы Золатурна.

Помнік
Помнік Тадэвушу Касцюшку ў Золатурне
Толькі што адкрыты помнік Т. Касцюшку ў Золатурне (21 кастрычніка 2017 г.)
47°12′33″ пн. ш. 7°32′09″ у. д.HGЯO
Краіна	Швейцарыя
Горад	Золатурн
Дата заснавання	2017

Гісторыя

Ідэя ўсталяваць помнік Тадэвушу Касцюшку, які некаторы час жыў і памёр у Золатурне, узнікла ў 2010 годзе і належыць былому паслу Беларусі ў Швейцарыі Андрэю Кулажанку, а рэалізацыя стала магчымай, дзякуючы намаганням Беларускага аб’яднання ў Швейцарыі^[2]. 17 кастрычніка 2017 года помнік быў усталяваны^[3], а 21 кастрычніка таго ж года адбылося яго ўрачыстае адкрыццё, на якім, сярод іншых, прысутнічалі ганаровыя госці з Беларусі, Польшчы, Літвы^[4], а таксама прадстаўнікі беларускай дыяспары з розных краін.

Помнік быў выраблены на сродкі Беларускага аб’яднання ў Швейцарыі і сям’і Сапегаў у прыватнасці. Першапачаткова на помніку планавалася зрабіць надпіс па-нямецку і па-беларуску, які павінен быў выглядаць наступным чынам:^[5]

Zu Ehren von Tadevuš Kaściuška 04.02.1746 — 15.10.1817 dem hervorragenden Sohn Belarus' von dankbaren Landsleuten. Belarussische Vereinigung in der Schweiz 2017

Тадэвуш Касцюшка 04.02.1746 — 15.10.1817 Выдатнаму сыну Беларусі ад удзячных суайчыннікаў. Беларускае аб'яднанне ў Швейцарыі 2017

Аднак падобны надпіс не задаволіў польскі бок, і пасол Польшчы ў Швейцарыі Якуб Кумах прымусіў мэрыю Золатурна выкрасліць з шыльды ўсе згадкі пра Беларусь і беларускамоўную версію^[5]. І толькі пасля ўмяшальніцтва Міністэрства замежных спраў Беларусі быў знойдзены кампрамісны варыянт, які цяпер выглядае так:^[6]

Tadeusz Kosciuszko 04.02.1746 — 15.10.1817 von der Belarussischen Vereinigung in der Schweiz 2017

Тадэвуш Касцюшка 04.02.1746 — 15.10.1817 ад Беларускага аб'яднання ў Швейцарыі 2017

Акрамя таго, падчас урачыстай цырымоніі адкрыцця помніка прадстаўнікі беларускай дыяспары трымалі расцяжку з надпісам: «Выдатнаму сыну Беларусі ад удзячных суайчыннікаў».

Рэакцыяй беларусаў на канфлікт у Залатурне было пачаць збор сродкаў на помнік Т. Касцюшку на яго радзіме, у Мерачоўшчыне^[6].

Галерэя

• 
  Помнік за некалькі хвілін да ўрачыстага адкрыцця.
• 
  Шыльда.
• 
  Прадстаўнікі беларускай дыяспары падчас урачыстага адкрыцця помніка.
• 
  Асвячэнне помніка.

Зноскі

1. Адкрыццё помніка Тадэвушу Касцюшку Архівавана 25 лютага 2018.
2. У швейцарскім Золатурне беларусы ўсталююць помнік Т.Касцюшку Архівавана 26 лютага 2018.
3. У Швейцарыі ўсталявалі помнік з таблічкай па-беларуску і па-нямецку
4. Пад расцяжкай «Выдатнаму сыну Беларусі…» у Швейцарыі адкрылі помнік Касцюшку
5. Пад ціскам палякаў з помніка Касцюшку ў Швейцарыі выкраслілі ўсе згадкі пра Беларусь
6. У Швейцарыі нарэшце адкрылі помнік Касцюшку