Салігорскі краязнаўчы музей

Саліго́рскі краязна́ўчы музе́й^[1] — музей, заснаваны ў 1976, адкрыты ў 1984 годзе ў горадзе Салігорску (Мінская вобласць, Беларусь).

Салігорскі краязнаўчы музей
Заснаваны	1976
Краіна	Беларусь
Месцазнаходжанне	Салігорск
Памеры фонду	9000 адзінак
Выставачная плошча	310 м²

Плошча экспазіцыі музея 310 м², больш за 9000 адзінак асноўнага фонду (2002, каля 10 000^[2] на 2005 год). Мае 3 залы ў выглядзе шахтавых штрэкаў (мастак А. В. Клязовіч). Сярод экспанатаў каменныя прылады працы 2—1-га тысячагоддзяў да н. э. з археалагічных раскопак на тэрыторыі раёна, калекцыі прадметаў матэрыяльнай культуры сялян XIX — пачатку XX стагоддзяў (жорны, кросны, церніца, гліняны і драўляны посуд), народнага ткацтва, інтэр’ер сялянскай хаты, узоры народнага адзення, матэрыялы пра падзеі грамадзянскай вайны, калектывізацыю, рэпрэсіі савецкага часу, пра мастака і пісьменніка Б. Залескага, прыродазнаўца К. Валасовіча.

У асобным раздзеле пра гісторыю Салігорска дэманструюцца прылады працы шахцёраў, узоры калійных солей. У зале прыроды чучалы птушак, жывёл, калекцыі насякомых рэгіёна.