Святлана Пятроўна Вінакурава

У Вікіпедыі ёсць артыкулы пра іншых людзей з прозвішчам Вінакурава.

Святлана Пятроўна Вінакурава (нар. 3 студзеня 1953, в. Дзмітравічы, Бярэзінскі раён, Мінская вобласць) — беларускі філосаф, сацыёлаг, чыноўніца. Доктар філасофскіх навук, прафесар.

Святлана Пятроўна Вінакурава
Дата нараджэння	3 студзеня 1953(1953-01-03) (72 гады)
Месца нараджэння	Дзмітравічы, Дзмітравіцкі сельсавет, Бярэзінскі раён, Мінская вобласць, Беларуская ССР, СССР
Грамадзянства	Беларусь
Род дзейнасці	выкладчыца ўніверсітэта
Месца працы	Беларуская дзяржаўная акадэмія мастацтваў
Навуковая ступень	доктар філасофскіх навук
Навуковае званне	прафесар
Альма-матар	БДУ (1974) Інстытут філасофіі НАН Беларусі (1978)
Узнагароды	ганаровы знак Беларускага прафсаюза работнікаў культуры[d] (2007) Ганаровая грамата Міністэрства культуры Беларусі[d] (2007) Ганаровая грамата Адміністрацыі Прэзідэнта Рэспублікі Беларусь[d] (2002)

Біяграфія

Скончыўшы школу з залатым медалём, у 1969 годзе паступіла на філасофскае аддзяленне Белдзяржуніверсітэта, які скончыла ў 1974 годзе, атрымаўшы дыплом з адзнакай. Затым паступіла ў аспірантуру Інстытута філасофіі і права Акадэміі навук БССР, скончыўшы яе ў 1978 годзе. У 1980 годзе прысуджана ступень кандыдата філасофскіх навук. Працавала ў Інстытуце філасофіі і права Акадэміі навук БССР малодшым і старшым навуковым супрацоўнікам, паралельна выкладала ў вышэйшых навучальных установах. У 1988—1990 гадах — дацэнт кафедры філасофіі Мінскага педагагічнага інстытута імя М. Горкага. У 1990—1993 гадах праходзіла навучанне ў дактарантуры Інстытуце філасофіі і права Нацыянальнай Акадэміі навук Беларусі, у 1994—1995 гадах загадвала кафедрай, якая ажыццяўляла падрыхтоўку аспірантаў і суіскальнікаў. З 1995 года — дарадца-кансультант галоўнага ўпраўлення грамадска-палітычнай інфармацыі, галоўны дарадца эканамічнага ўпраўлення Адміністрацыі Прэзідэнта Рэспублікі Беларусь. У 2002 годзе была прызначана начальнікам галоўнага ўпраўлення кантролю за працай галін сацыяльнай сферы Камітэта дзяржаўнага кантролю Рэспублікі Беларусь.

З 2006 года працуе першым прарэктарам Беларускай дзяржаўнай акадэміі мастацтваў.

З 2024 года дэпутатка Мінскага гарадскога Савета дэпутатаў 29-га склікання^[1]. У красавіку 2024 года была выбрана дэлегаткай на Усебеларускі народны сход 7-га склікання ад мясцовых Саветаў дэпутатаў^[2].

Навуковая дзейнасць

За перыяд працы ў Акадэміі мастацтваў апублікавала шэраг навуковых работ. Прыняла ўдзел у працы I з’езда вучоных Рэспублікі Беларусь, III Форуму навуковай і творчай інтэлігенцыі краін СНД (2008, Душанбэ). Вядзе навукова-арганізацыйную працу.

Матэрыялы і высновы навукова-даследчай працы ўключаны ў 11 аўтарскіх выданняў, 2 манаграфіі, 4 энцыклапедычныя даведнікі, 5 падручнікаў і вучэбных дапаможнікаў (усяго каля 200 публікацый). Падрыхтавала двух кандыдатаў філасофскіх навук, кіруе аспірантамі і суіскальнікамі. Навуковыя інтарэсы звязаны з філасофска-этычнай праблематыкай, распрацоўкай метадалагічных падыходаў да даследавання маральнай практыкі. Асноўныя навуковыя працы звязаны з пытаннямі маральнага развіцця асобы, абгрунтаваннем асаблівасцей гуманітарных ведаў і неабходнасці павышэння прэстыжу філасофскіх навук у сучасным грамадстве. Член экспертнага савета пры Адміністрацыі Прэзідэнта Рэспублікі Беларусь. Узначальвае Каардынацыйны савет па навуковай дзейнасці ў сферы культуры і мастацтва пры Міністэрстве культуры. Член аргкамітэта штогадовай Міжнароднай навуковай канферэнцыі «Культура. Навука. Творчасць». Член экспертнага савета ВАК.

Грамадска-палітычная дзейнасць

У пачатку 2010-х гадоў была старшынёй грамадскага аб’яднання «Дыялог Еўразія»^[3]. У 2020 годзе спрычынілася да выключэння з Беларускай дзяржаўнай акадэміі мастацтваў шэрагу студэнтаў за «парушэнне правілаў унутранага распарадку» (фактычна — за ўдзел у пратэстах супраць гвалту і фальсіфікацый на выбарах), патлумачыўшы: «У іх былі лялькаводы, хтосьці імі кіраваў з дарослых людзей, яны не здольныя ўзначаліць вось такі палітычны рух»^[4].

Узнагароды

• Грамата Адміністрацыі Прэзідэнта Рэспублікі Беларусь (2002),
• Грамата Камітэта дзяржаўнага кантролю Рэспублікі Беларусь (2004);
• Ганаровы знак Беларускага прафсаюза работнікаў культуры (2007),
• Ганаровая грамата Міністэрства культуры Рэспублікі Беларусь (2007),
• Ганаровая грамата НАН Беларусі (2009),
• Нагрудны знак «Юбілейны медаль у гонар 80-годдзя Нацыянальнай акадэміі навук Беларусі» (2011).