Сьера-Мадрэ-дэ-Ч’япас

У паняцця ёсць і іншыя значэнні, гл. Сьера-Мадрэ.

Сье́ра-Ма́дрэ-дэ-Ч’я́пас^[2] (ісп.: Sierra Madre de Chiapas), Сьера-Мадрэ^[2] — горны хрыбет у сістэме Кардыльераў Цэнтральнай Амерыкі, размешчаны ў паўднёвамексіканскім штаце Ч’япас, а таксама на захадзе Гватэмалы.

Сьера-Мадрэ-дэ-Ч'япас
Від на хрыбет з Панамерыканскай шашы
15°30′01″ пн. ш. 92°36′01″ з. д.HGЯO
Краіна	Мексіка
Размяшчэнне	Цэнтральная Амерыка
Горная сістэма	Кардыльеры
Даўжыня	каля 350 км
Найвышэйшая вяршыня	Тахумулька
Вышыня	4203[1] м
Медыяфайлы на Вікісховішчы

Хрыбет выцягнуты ўздоўж берага ад Тэўантэпекскага перашыйка на паўднёвы ўсход. Яго даўжыня складае каля 350 км, найвышэйшы пункт — 4220^[3] м над узроўнем мора (4203^[1], вулкан Тахумулька). Складзены пераважна вулканічнымі пародамі. Раён сейсмічна актыўны, у ім часта адбываюцца землетрасенні.

На поўдзень ад хрыбта ляжыць вузкая раўніна ўзбярэжжа Ціхага акіяна. На поўначы знаходзяцца даліна ракі Грыхальва і цэнтральная даліна Ч’япас, якія адлучаюць хрыбет ад плато Ч’япас і высакагор’яў Гватэмалы і Гандураса. На ўсход ад Гватэмалы хрыбет фармуе натуральную мяжу паміж Эль-Сальвадорам і Гандурасам.

Па хрыбце праходзіць асноўны водападзел паміж Ціхім і Атлантычным акіянамі.

Часам хрыбет называюць проста Сьера-Мадрэ. Іншыя назвы хрыбта можна таксама пачуць каля горада Гватэмала — Сьера-дэ-лас-Нубес (Sierra de las Nubes — воблачны горны ланцуг), на мяжы Гватэмалы з Мексікай — Сьера-дэ-Істакан (Sierra de Istatan).

Прыбярэжныя схілы ў 300—900 гг. н. э. былі населены невялікімі групамі мая; у канцы XV стагоддзя пераважалі ацтэкі. Першыя іспанскія даследчыкі з’явіліся ў 1524 годзе.