Крупская сядзіба

Крупская сядзіба — сядзіба, якая размешчана на вул. Савецкай у Крупках^[1].

Сядзіба
Сядзіба Свяцкіх
54°19′02,79″ пн. ш. 29°08′30,28″ у. д.HGЯO
Краіна	Беларусь
Горад	Крупкі
Архітэктурны стыль	Мадэрн
Будаўніцтва	1900

Гісторыя сядзібы

Сядзіба Свяцкіх у 1910

Сядзіба была пабудавана ў пачатку XX стагоддзя^[1].

На канец 1980-х сядзібны дом выкарыстоўваўся ў якасці адміністрацыйнага будынка^[1].

Планіроўка і размяшчэнне

Від на Бобр з сядзібы

Сядзіба размешчана непадалёку ад берага р. Бобр.

Сядзібны дом

Сядзібны дом у 2006

Захаваўся двухпавярховы сядзібны дом у стылі мадэрн, пабудаваны з цэглы.

Дом характарызуецца складанай асіметрычнай аб'ёмна-прасторавай кампазіцыяй, выкарыстаннем вежаў у якасці архітэктурных дамінантаў^[2]. Асабняк накрыты вальмавым дахам^[1].

Цэнтральная частка бакавога левага фасада аформлена ў выглядзе вежы, завершанай купалам складанай формы на васьмігранным светлавым барабане. Сцены члянёны паясамі русту. Аконныя праёмы разнастайныя па форме (прамавугольныя, круглыя, квадратныя, авальныя, лучковыя), аздоблены ліштвамі^[1]. Цэнтральны ўваход з боку галоўнага фасада вылучаны неглыбокім рызалітам, які завершаны атыкам. Уваходная частка бакавога правага фасада будынка фланкіравана 2 невялічкімі вежамі. Планіроўка мяшаная^[1].

Паверхі злучаюць 3 розныя па афармленні лесвічныя вузлы. Балясіны цэнтральнай лесвіцы (чыгуннае ліццё) упрыгожаны геаметрычным арнаментам^[1].

Парк

Асобныя дрэвы вакол сядзібы ў 2006

Вакол сядзібы захаваліся рэшткі парка^[1].

Зноскі

1. Пятросава А. Ю. Сядзібны дом // «Збор помнiкаў гiсторыi i культуры Беларусі. Мінская вобласць. Кніга 1». Мінск, выдавецтва «Беларуская Савецкая Энцыклапедыя імя Петруся Броўкі», 1987 год.
2. Федорук 2000.