Сядзіба князёў Мяшчэрскіх (Клімавічы)

Сядзібны дом князёў Мяшчэрскіх — будынак у Клімавічах па вуліцы Савецкай, 69. Помнік драўлянага дойлідства XIX ст., пабудаваны ў 1867 годзе ў псеўдарускім стылі. Цяпер музей.

Славутасць
Сядзібны дом князёў Мяшчэрскіх
53°36′41,17″ пн. ш. 31°57′45,15″ у. д.HGЯO
Краіна	Беларусь
Горад	Клімавічы
Архітэктурны стыль	псеўдарускі стыль
Дата пабудовы	1867 год
Статус	Гісторыка-культурная каштоўнасць Беларусі, шыфр 513Г000465шыфр 513Г000465
Медыяфайлы на Вікісховішчы

У асабняку да Кастрычніцкай рэвалюцыі жыла з сям’ёй Марыя Мікалаеўна з Мяшчэрскіх, жонка апошняга клімавіцкага павятовага маршалка Мікалая Бекмана. Пазней сям’ю перасялілі ў невялікі бедны дамок на ўскраіне горада^[1].

Архітэктура

Драўляны аднапавярховы амаль квадратны ў плане будынак з прыбудовай у паўднёва-заходняй частцы. Кампазіцыя галоўнага фасада трохчасткавая. Цэнтральная частка вылучаная мансардай з кілепадобным франтонам, поле якога падзелена крыж-накрыж прафіляванымі сцяжкамі, упрыгожанае разнымі накладнымі дэталямі, ламанымі лесвічнымі стужкамі. Бакавыя часткі завершаныя трохвугольнымі франтонамі. Шырокая паласа фрызу дэкараваная разьбой у выглядзе карунак. Вокны лучковыя, на галоўным і паўднёвым фасадах упрыгожаныя разнымі ліштвамі. Планіроўка калідорная. З паўночнага боку размешчаны вестыбюль з лесвіцай у мансарду.