Таццяна Сяргееўна Кузіна

Таццяна Сяргееўна Кузіна (нар. 26 красавіка 1973(1973-04-26), Мінск) ― беларуская даследчыца, грамадская дзяячка, лектарка, экспертка ў сферы грамадзянскай супольнасці, грамадзянскага ўдзелу і публічнага адміністравання.

Таццяна Сяргееўна Кузіна
Дата нараджэння	26 красавіка 1973(1973-04-26) (52 гады)
Месца нараджэння	Мінск, Беларуская ССР, СССР
Грамадзянства	Беларусь
Род дзейнасці	Даследчык
Месца працы	Школа маладых менеджараў і публічнага адміністравання SYMPA
Навуковая ступень	Магістар паліталогіі
Навуковы кіраўнік	Палітычная навука, публічнае адміністраванне

Біяграфія

Нарадзілася 26 красавіка 1973 года ў Мінску.

Скончыла магістратуру Еўрапейскага гуманітарнага ўніверсітэта, магістр палітычных навук^[1].

У 1996—2009 гадах працавала ў Еўрапейскім гуманітарным універсітэце, была намесніцай дэкана Франка-беларускага факультэта палітычных і адміністрацыйных навук, узначальвала Офіс публічных і міжнародных сувязяў, выкладала на бакалаўрскай праграме «Палітычныя і еўрапейскія даследаванні»^[1].

У 2010—2015 гадах была выканаўчай дырэктаркай Беларускага інстытуту стратэгічных даследаванняў, супрацоўнічала з Беларускай даследчай радай ды іншымі навукова-даследчымі цэнтрамі і арганізацыямі грамадзянскай супольнасці^[1].

Грамадская і экспертная дзейнасць

Стаяла ля вытокаў стварэння Школы маладых менеджараў публічнага адміністравання (Sympa) і Беларускага інстытута рэформы і трансфармацыі публічнага адміністравання (BIPART), у якіх выкладала і займалася даследчай дзейнасцю^[1].

Зрабіла важны ўнёсак у шматлікія праграмныя, стратэгічныя і даследчыя дакументы, у тым ліку ў рамках удзелу Sympa ў міжнародным даследчым праекце «EU-STRAT», які ажыццяўляўся ў 2016—2019 гадах з удзелам еўрапейскіх універсітэтаў (у тым ліку са Свабодным універсітэтам Берліна і Лейдэнскім універсітэтам у Нідэрландах) і навукова-даследчых арганізацый ^[2].

Крымінальная справа

28 чэрвеня 2021 года арыштавана ў Нацыянальным аэрапорце Мінск. Ёй былі прад’яўлены абвінавачванні па частцы 1 артыкула 357 і па частцы 3 артыкула 361 Крымінальнага кодэкса Рэспублікі Беларусь^[3]. 20 ліпеня разам з іншымі арыштаванымі калегамі прызнана палітзняволенай^[4].

6 лютага 2023 года ў Мінску пачаўся суд над Таццянай Кузінай і Валерыяй Касцюговай. У залежнасці ад ролі Таццяну Кузіну і Валерыю Касцюгову абвінавачвалі па трох артыкулах Крымінальнага кодэкса: частцы 1 артыкула 357 («дапамога дзеянням, учыненым з мэтай захопу ўлады»), частцы 3 артыкула 361 («заклікі да дзеянняў, накіраваных на прычыненне шкоды нацыянальнай бяспецы») і частцы 3 артыкула 130 («распальванне іншай сацыяльнай варожасці»)^[5]. 17 сакавіка 2023 года Таццяне Кузінай і Валерыі Касцюговай прысудзілі па 10 гадоў калоніі агульнага рэжыму^[6].