Цэнтр беларускай культуры (Даўгаўпілс)

Цэнтр беларускай культуры (ЦБК; лат.: Baltkrievu kultūras centrs) — установа культуры ў Даўгаўпілсе, Латвія. Сядзіба размешчана па вуліцы Алеяс, 68-1А^[2]. З 2013 года кіраўніцай з’яўляецца Жанна Раманоўская^[3].

Цэнтр беларускай культуры
Дата заснавання	25 сакавіка 1999
Тып	культурная ўстанова[d]
Лідар	Жанна Вячаславаўна Раманоўская
Цэнтр	Даўгаўпілс[1]
Сайт	bkc.daugavpils.lv/… (бел.)

Заснаваны 25 сакавіка 1999 года, рашэннем дэпутатаў Даўгаўпілскай гарадской думы, як бюджэтная ўстанова культуры Даўгаўпілскага гарадскога самакіравання^[4].

Цэнтр беларускай культуры займаецца захаваннем і папулярызацыяй беларускай культуры, арганізацыяй і правядзеннем культурных мерапрыемстваў у Латвіі^[4].

Пры ЦБК створана 7 творчых калектываў: ансамбль беларускай народнай песні «Купалінка» (1992 г.), танцавальны ансамбль «Лянок» (2000 г.), тэатральная студыя «Паўлінка» (2007 г.), харавая капэла «Спадчына» (2013 г.) і вакальна-інструментальны ансамбль «Пралескі» (2014 г.). Таксама дзейнічае мастацкая студыя «Каларытны свет» (2017 г.), дзіцячая студыя «Скарбніца» (2019 г.). У 2018 г. быў адкрыты музейны пакой «Беларуская хатка»^[4].

Творчыя калектывы рэгулярна ўдзельнічаюць у Латвійскім свяце танца і песні, міжнародных фестывалях «Балтыка», «Аўгшдаўгава», «Славянскі базар у Віцебску», «Браслаўскія зарніцы», «Жураўлі і журавіны Міёрскага краю», «Залессе збірае сяброў», «Вентспілскі вянок», «Фэст» і іншых фестывалях у Латвіі, Беларусі, Эстоніі і Літве^[4].

Працуе народная беларуская бібліятэка, якая налічвае каля 1750 кніг. У рамках культурна-асветніцкай дзейнасці ЦБК рэгулярна праводзяцца: міжнародны фестываль «Беларускі кірмаш у Даўгаўпілсе»; Дні беларускай культуры ў Даўгаўпілсе; народнае свята «Купалле» і беларускія абрадавыя святы; літаратурныя вечары; сустрэчы з паэтамі, пісьменнікамі і цікавымі людзьмі^[4].

Акрамя гэтага, пастаянна рыхтуецца адукацыйна-гульнявая праграма для дзіцячых садоў «Нашы суседзі — беларусы» і экскурсійная праграма для школьнікаў «Беларускі дом»^[4].