Якаў Сямёнавіч Малайчук

Я́каў Сямё́навіч Малайчу́к (15 верасня 1944, в. Дзераўная Драгічынскага раёна Брэсцкай вобласці — 25 кастрычніка 2015, Пружаны) — беларускі харавы дырыжор, краязнаўца. Заснавальнік адзінага на Беларусі музея Рыгора Шырмы, які знаходзіцца ў Пружанах.

Якаў Сямёнавіч Малайчук
Дата нараджэння	15 верасня 1944(1944-09-15)
Месца нараджэння	Дзераўная, Дзераўноўскі сельсавет, Антопальскі раён, Брэсцкая вобласць, Беларуская ССР, СССР
Дата смерці	25 кастрычніка 2015(2015-10-25) (71 год)
Месца смерці	Пружаны, Пружанскі раён, Брэсцкая вобласць, Беларусь
Альма-матар	Брэсцкае музычнае вучылішча (1968)
Узнагароды і прэміі

Біяграфія

Нарадзіўся ў в. Дзераўная (цяпер у Драгічынскім раёне Брэсцкай вобласці) ў сялянскай сям’і. Бацька загінуў на вайне ў 1945 годзе.

У 1961 Якаў скончыў Імянінскую сярэднюю школу і паступіў у Брэсцкае музычнае вучылішча (дырыжорска-харавое аддзяленне). На трэцім курсе забраны на вайсковую службу. Скончыў вучылішча ў 1968 годзе і накіраваны на працу дырэктарам Ружанскай музычнай школы. Тут адразу зладзіў хор, які неўзабаве займеў папулярнасць па ўсёй Берасцейшчыне.

З 10 лютага 1971 — дырэктар Пружанскай музычнай школы. Менавіта ў час яго знаходжання на пасадзе дырэктара музычная школа ператварылася ў дзіцячую школу мастацтваў, а ў 1978 яна атрымала імя Рыгора Шырмы. У 1982 годзе пры школе Якуб Сямёнавіч стварыў мемарыяльны музей у імя славутага дырыжора. На пасадзе дырэктара працаваў да 15 чэрвеня 2005 года, пасля — выкладчык гэтай школы.

У 1976 Якаў Малайчук стварыў пры пружанскім Палацы культуры хор, які ўзначальваў да 1992 года. З 2003 кіруе народным камерным хорам пружанскага Палацу культуры^[1]. Хор з’яўляецца дыпламантам разнастайных конкурсаў і фестываляў, выконвае творы беларускіх і замежных кампазітараў, духоўныя спевы.

У 1999 годзе ўзнагароджаны медалём Францыска Скарыны^[2] за значны асабісты ўнёсак у памнажэнне духоўнага і інтэлектуальнага патэнцыялу.

Зноскі

1. Марына Вакульская.. В выходные Пружанщина принимала два фестиваля (нявызн.). Раённыя будні (13 лютага 2012).
2. Указ прэзідэнта Рэспублікі Беларусь 1 снежня 1999 г. N 702 «Аб узнагароджанні групы работнікаў прадпрыемстваў і арганізацый Брэсцкай вобласці дзяржаўнымі ўзнагародамі Рэспублікі Беларусь» (руск.). Нацыянальны прававы партал Рэспублікі Беларусь (13 лютага 2012).