Маладая Беларусь (грамадска-палітычная арганізацыя)

«Маладая Беларусь» — беларуская грамадска-палітычная арганізацыя ў 1917—1919 гг^[1].

Маладая Беларусь
Адміністрацыйны цэнтр	Яраслаўль Менск
Тып арганізацыі	грамадская арганізацыя і палітычная арганізацыя[d]
Кіраўнік	Усевалад Макаравіч Ігнатоўскі
Заснаванне
Дата заснавання	май 1917
Ліквідацыя
Дата скасавання	снежань 1919

У паняцця ёсць і іншыя значэнні, гл. Маладая Беларусь (значэнні).

Створана ў маі 1917 года ў Яраслаўлі пры Мінскім настаўніцкім інстытуце на базе вучнёўскай арганізацыі эсэраўскага кірунку «Наш край». Кіраўнік — У. М. Ігнатоўскі^[1].

У яе ўваходзілі А. Анташэўскі, С. Булат, В. С. Гарбацэвіч, В. Камлюк, Я. Каранеўскі, М. Мароз, І. Поляк, А. Сташэўскі, В. Сташэўскі, М. Чарот, П. Шчарбінскі і іншыя^[1].

У пачатку дзейнасці арыентавалася на праграму Беларускай сацыялістычнай грамады. У чэрвені 1917 года Ігнатоўскі завочна абраны ў склад яе ЦК^[1].

У 1917—1918 гадах падтрымлівала сувязь з Яраслаўскай беларускай радай, праводзіла культурна-асветніцкую працу сярод беларускіх бежанцаў: арганізоўвала беларускія вечарыны, тэматычныя лекцыі, распаўсюджвала беларускую перыёдыку^[1].

Пасля вяртання інстытута ў Мінск у лістападзе 1918 года, як аўтаномная адзінка, увайшла ў склад партыі беларускіх эсэраў (БПС-Р), а яе кіраўнік Ігнатоўскі — у склад яе ЦК^[1].

Восенню 1919 года выступіла за ўзброеную барацьбу супраць польскіх акупантаў, за стварэнне антыпольскага фронту ў саюзе з бальшавікамі^[1].

У снежні 1919 года большасць радыкальна настроеных членаў «Маладой Беларусі» выйшла з БПС-Р і ў студзені 1920 года стварыла Беларускую камуністычную арганізацыю^[1].