Святлана Яўгенаўна Богуш

Святлана Яўгенаўна Богуш (нар. 17 мая 1987, Мінск) — беларуская мовазнаўца, паэтка, перакладчыца.

Святлана Яўгенаўна Богуш
Асабістыя звесткі
Дата нараджэння	17 мая 1987(1987-05-17) (38 гадоў)
Месца нараджэння	Мінск, Беларуская ССР, СССР
Грамадзянства	Беларусь
Альма-матар	філалагічны факультэт БДУ (2010)
Месца працы	Інстытут мовазнаўства НАНБ
Прафесійная дзейнасць
Род дзейнасці	мовазнаўца, паэтэса, перакладчыца
Мова твораў	беларуская
Грамадская дзейнасць
Член у	Рэспубліканская тэрміналагiчная камiсiя пры НАН Беларусi

У Вікіпедыі ёсць артыкулы пра іншых людзей з прозвішчам Богуш.

Біяграфія

Нарадзілася 17 мая 1987 года ў Мінску. У 2010 годзе скончыла філалагічны факультэт Беларускага дзяржаўнага ўніверсітэта па спецыяльнасці «Беларуская філалогія». У 2011 годзе завяршыла навучанне ў магістратуры, у 2015 — у аспірантуры пры тым жа ўніверсітэце^[1].

З 2016 да 2021 года працавала рэдактарам у аддзеле навуковых перыядычных выданняў упраўлення рэдакцыйна-выдавецкай работы БДУ. З 1 лістапада 2022 года працуе ў Інстытуце мовазнаўства імя Якуба Коласа на пасадзе малодшага навуковага супрацоўніка аддзела сучаснай беларускай мовы^[1]. З 2023 года — вучоны сакратар Рэспубліканскай тэрміналагічнай камісіі пры НАН Беларусі^[1].

Навуковая дзейнасць

Асноўныя навуковыя інтарэсы — гісторыя беларускага мовазнаўства 1920-х гадоў, мова справаводства^[1].

Творчасць

Святлана Богуш таксама вядомая як паэтка і перакладчыца. Перакладае са славацкай мовы. Яе пераклады друкаваліся ў часопісах «Arche», «Прайдзісвет», «Макулатура», «Дзеяслоў», «Верасень»^[2].

Яна пераклала раман Рудольфа Слобады «Розум» (Мінск, 2012), а таксама вершы Лідзіі Вадкерці-Гаварнікавай, Норы Ружычкавай, Эвы Лукі, Петара Мачаўскага, што ўвайшлі ў анталогію сучаснай славацкай паэзіі «Палеміка з аптымізмам» (Мінск, 2014). Перакладала таксама творы Катарыны Куцбэлавай для зборніка аўтарак з Сярэдняй Еўропы «Чатыры» (Мінск, 2016)^[2].

Разам з Петарам Мілчакам пераклала на славацкую мову зборнік беларускіх народных казак «Любоў здраду асіліць» (2020). У 2021 годзе выйшла яе кніга для дзяцей «Гарлачык для гусі» (Мінск, 2021)^[2].