Kaji hayat
From Wikipedia, the free encyclopedia
Biologi atau ilmu hayat adalah ilmu nang mampalajari aspék pisik kahidupan. Istilah "biologi" dipinjam matan bahasa Walanda, biologie, nang jua diturunakan matan gabungan kata bahasa Yunani, βίος, bios ("hidup") wan λόγος,logos ("lambang", "ilmu"). Istilah "ilmu hayat" diinjam matan bahasa Arab, jua baarti "ilmu kahidupan". Ubjik kajian biologi wahini banyak banar wan macakup samua makhluk hidup di babagai macam kahidupannya.
Bamacam-macam cabang biologi mangususakan diri di satiap kalumpuk organisma, kaya botani (ilmu masalah tatumbuhan), zoologi (ilmu masalah binatang), wan mikrobiologi (ilmu masalah jasad renik). Balain-lainan wan pangalumpukan didasari pada ciri-ciri pisik kalumpuk organisme dipalajari di sistimatika, nang didalamnya ada jua taksonomi wan palebiologi.
Bamacam-macam aspik kahidupan dikaji jua di biologi. Ciri-ciri pisik bagian awak dipalajari di anatomi wan morfologi, amun pungsinya dipalajari di fisiologi. Parilaku binatang dipalajari di etologi. Parkambangan ciri pisik makhluk hidup di kurun waktu panjang dipalajari dalam évolusi, lamum partumbuhan wan parkambangan di siklus kahidupan dipalajari di biologi parkambangan. Hubungan sasama makhluk lawan alam sakitarnya dipalajari di ékologi; Mikanisma pewarisan sipat (nang baguna dalam upaya manjaga kalangsungan hidup sabuting macam makhluk hidup) dipalajari dalam génétika.
Wahini bakambang aspék biologi nang mangkaji kamungkinan ba-évolusinya makhluk hidup kaina, jua kamungkinan adanya makhluk hidup di planét-planét salain bumi, yaitu astrobiologi. Pahadangan nintu, parkambangan tiknulugi mambada'i pangkajian di tingkat molekul panyusun organisma malalui biologi molekular lawan biokimia, nang banyak didukung ulih parkambangan téknik komputasi malalui bidang bioinformatika.
Ilmu biologi banyak bakambang di abad ka-19, nang dimulai lawan panamuan ulih ilmuan bahwa organisme baisi karakteristik inti. Biologi wahini adalah subjék palajaran sakulah wan univérsitas di saluruh dunia, nang jutaan makalah diulah satiap tahun dalam susunan luas jurnal biologi wan kadukteran.[1]