Bituriges

Ar Vituriged^[1], pe Bituriges, peBituriges Cubi^[2], a oa unan eus pobloù Galia, diazezet er pezh a zo bremañ departamantoù Cher hag Indre.

Galia er c’hentañ kantved kent JK

Bro

En em astenn a rae o bro war ar pezh a zo bremañ departamantoù Cher hag Indre, ha kornaoueg Allier. Stumm un tric'horn a oa gant o domani. Avaricum (Bourges) e oa o c’hêr-benn.

En-dro dezho e oa ar pobloù-mañ :

• Aedui er reter
• Carnutes en hanternoz
• Turones er gwalarn
• Pictones er c’hornôg
• Lemovices er c'hreisteiz.

Istor

Hervez Titus Livius e oant bet unan eus pobloù galloudusañ Galia war-dro 600 kent JK^[3].

En amzer Julius Caesar e oant kevredet gant an Aedui^[4]. Sevel a rejont a-du gant emsavadeg Verkingetorix koulskoude, ha kas a rejont tud da emgann Alesia (12 000 den)^[5]. E-pad Brezel Galia e voe lakaet seziz war Avaricum gant soudarded Caesar. E lec’hioù all e Galia e oa bet c’hwezet an tan er c’hêrioù, war urzh Verkingetorix, evit mirout ouzh ar Romaned da gaout pourvezañsoù enno. Gant annezidi Avaricum e oa bet aspedet Verkingetoriks da espern o c’hêr. Dont a reas armeoù Caesar da gemer anezhi ha da argas armeoù sikour Verkingetorix. Diwar an 40 000 den a oa serret e kêr, ne voe nemet 800 a chomas bev^[6].

En Eil kantved goude JK edo bro ar Bituriges e proviñs Gallia Aquitania.

Anv

Talvezout a rae o anv Bituriges kement ha « rouaned ar bed », diwar an div elfenn c'halianek bitu-, « bed », ha rix, riges « roue, rouaned »^[7]. Eus an anv Bituriges eo deveret anv kêr Bourges ha hini proviñs Berry.