Nepita

A nepita (Calamintha nepeta nepeta) hè un tipu di fiore chì face parte di a famiglia di e Lamiaceae.^[1]

A nepita
Calamintha nepeta nepeta
Classificazione scentifica
Regnu	Plantae
Divisione	Magnoliophyta
Classa	Magnoliopsida
Ordine	Lamiales
Famiglia	Lamiaceae
Generu	Calamintha
Nome binuminale
Calamintha nepeta nepeta Aiton, 1753

Descrizzione

A nepita hè alta circa 30 à 40 cm. Fiurisce da ghjugnu à sittembri. I fiori sò turchini chjari è assai profumati.

Etnolugia

A nepita hè profumata è hè stata da sempre imprudata in a gastronumia corsa, per mette in e salse o in i tiani, in a suppa d'erbette, ma dinò in a carne, i pesci o i ligumi. A dici Paulu Simonpoli chì "Si manghjava ancu per spuntinu, cù oliu, annant'à un pezzu di pane.".^[2]

Ci conta Simonpoli chì "U Ghjovi Santu si ne mettia ind'e frittate è e bastelle cù menta è puleghju (Niolu)".^[3]

Citazione

Accade chì a nepita fussi citata in a literatura è a cultura corsa. Per indettu in sti pruverbii corsi:

• Trà nepita è puleghju, unu hè male è l’altru peghju.
• O nepita chì stai cusì imbuffata, hai le sette virtù è ùn sì circata.

è in A Funtana d'Altea di Ghjacumu Thiers:

• È Altea chì aspetta. A machja puzza. Mintrastu è nepita. Eramu trè, eo, ellu è Niculaiu. A pena in capu di a voce chì mughja. L'ombra hè fresca.