Ofride gialla

L'Ufridi giadda (o Ofride giallu) (ophrys lutea) hè una spezia d'urchidea tarrania vivaci appartinendu à a famiglia di l'Orchidaceae. 'Ssa pianta arbacea si caratterizeghja da i so fiora giaddi giaddi disposti in gaspa lena annantu à u picciolu fiurali.

L'ufridi giadda
ophrys lutea
Classifica scentifica
Regnu	Plantae
Divisioni	Magnoliophyta
Classa	Liliopsida
Ordini	Asparagales
Famiglia	Orchidaceae
Genaru	Ophrys
Nomu binuminali
Ophrys lutea Aiton, 1753

Discrizzioni

I casci di l'Ophrys lutea sò basali, uvali à lanceulati, d'un culori verdi chjaru à verdi scuru. Sò disposti à a basa di u picciolu fiurali è poni ancu essa prisenti longu à u picciolu, divintendu prugrissivamenti più chjuchi à capu insù. U picciolu, ribustu è rittu pò aghjunghja un'altezza da 15 à 40 centimi. I fiora, di culori giaddu giaddu sò ragruppati in infiuriscenzi à forma di gaspa lena, cumposti da 2 à 10 fiora. U labeddu hè largu è trilubatu, incù lobi latirali incurvati è un lobu cintrali più largu, prisintendu mutivi à forma di abba o di mosca. I fiora di l'Ophrys lutea sò ermafruditi è sò inamacati par u più da l'insetti. L'ufridi giaddu fiurisci da marzu à maghju.

Ripartizioni

Ophrys lutea hè prisenti in i righjoni mediterranii d'Auropa, d'Africa subrana è d'Asia uccidentali. Omu a trova in Francia, in iSpagna, in Italia, in Grecia, à u Portugallu, in Turchia, è ancu in certi paesi d'Africa subrana tali u Maroccu, l'Algiria è a Tunisia. 'Ss'urchidea prifirisci l'ambienti varii, tali i pratulini asciutti, i machji, l'arici di furesti è i landi. Apprizzeghja i terri beddi assiccati è appena aciti o neutri, è si sviluppa in zoni esposti à u soli o à meza ombra. A spezia pò essa truvata à altitudini andendu da u liveddu di u mari sinu à à l'incirca 1500 metri.

In Corsica

L'ufridi giaddu hè rarissima è esisti solu in qualchì lucalità di Corsica. Si trova à u pianu sottumediterraniu (0-100 metri) o ancu à u pianu mezumediterraniu infiriori (100-600 metri).

Tassunumia

Esisteni parechji sottuspezii d'ufridi giaddu:

• Ophyrs lutea subsp. lutea
• Ophyrs lutea subsp. minor
• Ophyrs lutea subsp. melena
• Ophrys lutea subsp. phryganae

Prutizzioni

L'Ophrys lutea ùn hè micca cunsidarata com'è una spezia minacciata à a scala mundiali. Eppuri, in certi righjoni, pò essa prutetta par via di a digradazioni di u so ambienti è di a racolta illegali di i so fiora. 'Ss'urchidea hè ancu prutetta da a Cunvinzioni annantu à u cummerciu internaziunali di i spezii di fauna è di flora salvatichi minacciati d'estinzioni (CITES), chì intardisci u so cummerciu. Sforzi di cunsirvazioni, tali a missa in piazza di riservi naturali è di prugrammi di riintruduzioni, sò fatti in certi loca pà pruteghja è prisirvà 'ssa spezia d'urchidea.