Aneirin Talfan Davies

Bardd, darlledwr, a beirniad llenyddol oedd Aneirin Talfan Davies (Aneurin ap Talfan; 11 Mai 1909 – 14 Gorffennaf 1980).

Aneirin Talfan Davies
Ffugenw	Aneirin ap Talfan
Ganwyd	11 Mai 1909  Felindre
Bu farw	14 Gorffennaf 1980  Caerfyrddin
Dinasyddiaeth	Cymru
Alma mater	Prifysgol Cymru
Galwedigaeth	bardd
Plant	Geraint Talfan Davies
Gwobr/au	OBE

Bywgraffiad

Cafodd ei eni yn Nhrefach Felindre, Sir Gaerfyrddin, lle roedd ei dad yn weinidog, ac yna mynychodd Ysgol Ramadeg Tre-gŵyr wedi i'r teulu symud i Dre-gŵyr. Yn ystod y tridegau aeth i weithio i Lundain fel fferyllydd cyn dychwelyd ac ymsefydlu yn Abertawe. Yn ystod yr Ail Ryfel Byd dechreuodd weithio i'r BBC yn Abertawe, ac yn ddiweddarach daeth yn Rheolwr y BBC yng Nghymru, ac fe gynhyrchodd rhai o weithiau cynnar Dylan Thomas. Yn dilyn marwolaeth Dylan ysgrifennodd astudiaeth o'i waith fel bardd crefyddol. Cyfieithodd farddoniaeth Christina Rossetti i'r Gymraeg, a golygu llythyron David Jones a fu'n ddylanwad pwysig ar Aneirin Talfan.^[1]

Roedd yn frawd i'r Barnwr Alun Talfan Davies. Gyda'i frawd sefydlodd y wasg a'r tŷ cyhoeddi Llyfrau'r Dryw yn Llandybie, a ddaeth yn ddiweddarach yn Christopher Davies. Sefydlodd hefyd y cylchgrawn Heddiw a gyda'i frawd y cylchgrawn Barn.

Ei fab yw Geraint Talfan Davies sydd wedi dal sawl swydd o bwys yng Nghymru

Llyfryddiaeth

• Y Ddau Lais (1937). Cerddi.
• Yr Alltud (1944). Astudiaeth o waith James Joyce.
• Y Tir Diffaith (1946). Astudiaeth o waith T. S. Eliot.
• Eliot, Pwshcin, Poe (1948). Astudiaeth.
• Gwŷr Llên (1948). Beirniadaeth lenyddol.
• (golygydd) Blodeugerdd o Englynion (1950)
• (golygydd) Munudau gyda'r beirdd (1954)
• Crwydro Sir Gâr, Cyfres Crwydro Cymru (1955)
• Sylwadau (1957)
• Pregethau a Phregethu'r Eglwys (1957)
• (golygydd) Englynion a Chywyddau (1958)
• Dylan: Druid of the Broken Body (1964)
• Yr Etifeddiaeth Dda (1967)
• Gyda Gwawr y Bore (1970)
• Crwydro Bro Morgannwg, 2 gyfrol, Cyfres Crwydro Cymru (1972, 1976)
• Diannerch Erchwyn a Cherddi Eraill (1976). Cerddi.
• David Jones: Letters to a Friend (1979). Astudiaeth.

Astudiaethau

• Ifor Rees (gol.), Bro a Bywyd: Aneirin Talfan Davies 1909-1980 (Cyhoeddiadau Barddas, 1992)