Yn 2025, dyluniwyd cyfansoddiad swyddogol i'r Gymdeithas. David Ingham (Coleg yr Iesu) a Maia Williams (Coleg yr Iesu), y cyd-gaplaniaid ar y pryd, a'i dyluniodd. Mae'n debyg nad oedd gan y Gymdeithas gyfansoddiad cyn hynny, neu y collwyd ef rywbryd ar hyd y blynyddoedd.

Mae'r Cyfansoddiad yn darllen felly:

"Yn enw y rhai hynny a gollodd eu gwaed dros eu gwlad a’u hiaith, a’r rhai hynny sy’n dal i frwydro; yn enw y beirdd, y gwyddonwyr a’r gwleidyddion a ffurfiodd y Gymdeithas gant a hanner o flynyddoedd cyn y dwthwn hwn; ac yn enw y bardd hwnnw a gynganeddodd cyn y bu cynghanedd, a’i eiriau’n dal i lifo ynom, a’i ddysg ynghlwm wrth ein hangerdd ni; yn enwau y rhai hynny oll,

"yr ydym ni, aelodau Cymdeithas Dafydd ap Gwilym,

"y rhai hynny a fu a’r rhai hynny a fydd,

"yn derbyn, deddfu, a datgan ein bod ni’n ffyddlon i’r Cyfansoddiad hwn."

ERTHYGL I

Cymraeg ydyw iaith y Gymdeithas.

Cynhaler pob cyfarfod drwy gyfrwng y Gymraeg, ac felly y mae’n rhaid i bob aelod o’r pwyllgor fedru’r Iaith. Lle bo croeso i’r di-Gymraeg yn ein digwyddiadau a chyfarfodydd, rhaid cynnal y rhai hynny yn ddwyieithog. Mewn cyfathrebiad dwyieithog, boed ar lafar neu’n ddigidol, rhaid i’r Gymraeg ragflaenu’r Saesneg.

ERTHYGL II

Enw swyddogol y Gymdeithas ydyw 'Cymdeithas Dafydd ap Gwilym'. Fe’i seiliwyd ym 1886, a’i henwi ar ôl y bardd canoloesol Dafydd ap Gwilym. Bu’n draddodiad i bob cyfarfod gychwyn gyda darlleniad o’i waith gan y Caplan, a thrafodaeth arno, er na orfodir hyn bellach.

Er yr adwaenir y Gymdeithas ar lafar fel 'Y Dafydd', 'Cymdeithas Dafydd ap', neu 'Y Gymdeithas', argymhellir yn gryf yn erbyn 'Cymdeithas Gymraeg Prifysgol Rhydychen' (a’i chyfieithiad Saesneg).

ERTHYGL III

Y mae hawl gan bob myfyriwr israddedig ac ôl-raddedig ym Mhrifysgol Rhydychen i ymaelodu â’r gymdeithas, ac y mae pob aelod o’r Gymdeithas gydradd â’i gilydd, cyhyd ag y bo’n ymdrechu i ddefnyddio’r Gymraeg a pharchu’r hanes hir sy’n sylfaen i’r Gymdeithas. Ni waeth ein gwahaniaethau arwynebol—hil, rhyw, rhywioldeb, neu grefydd—cofier mai Cymry ŷm oll, ac mai eiddom ninnau ydyw’r Iaith.

ERTHYGL IV

Caplan ydyw’r enw ar lywydd y Gymdeithas. Etholer ef / hi yn Nhymor y Drindod gan aelodau oll y Gymdeithas, ynghyd â gweddill y pwyllgor. Ceir hefyd ethol dau Gyd- gaplan, lle bo gofyn.

Y mae swyddi eraill y pwyllgor yn amrywio o flwyddyn i flwyddyn, ond y mae’n awgrym cadw Trysorydd, Ysgrifennydd, a Swyddogion Cymdeithasol. Y mae’n ddyletswydd ar bob aelod o’r Gymdeithas i gydnabod arwyddocâd ei swydd a gweithio’n ddiwyd dros Gymru, dros Gymreictod, a thros yr Iaith mewn man sydd iddi’n aml mor elyniaethus.

ERTHYGL V

Ynghyd â digwyddiadau wythnosol y Gymdeithas, rhaid cynnal Eisteddfod flynyddol. Estynner gwahoddiad i holl ysgolion Cymru gystadlu mewn amryw o gystadleuthau, a’r ennillydd yn cael dod i ymweld â’r Gymdeithas ar ddiwrnod yr Eisteddfod er mwyn ei gadeirio. Rhaid i aelodau’r pwyllgor gynnal y ddefod hon mewn modd parchus sy’n talu teyrnged i’r traddodiad.

ERTHYGL VI

Rhaid i’r rhai sy’n bresennol ganu’r anthem genedlaethol, Hen Wlad Fy Nhadau, ar ddiwedd pob digwyddiad a chyfarfod.

ERTHYGL VII

Dim ond trwy bleidlais holl aelodau’r Gymdeithas y ceir ategu i’r Cyfansoddiad hwn.

Cymdeithas Dafydd ap Gwilym
Dynodwyr
Enghraifft o:	cymdeithas fyfyrwyr
Rhan o	Prifysgol Rhydychen
Gwladwriaeth	y Deyrnas Unedig

Hanes

Traddodiadau

Cyfansoddiad

Llywyddion

Rhai cyn-aelodau

Llenyddiaeth

Dolenni allanol