Lasminingrat

Raden Ayu Lasminingrat (sunderaz: ᮛ᮪ᮓ᮪. ᮃᮚᮥ ᮜᮞ᮪ᮙᮤᮔᮤᮀᮛᮒ᮪; Garut, Ekialdeko Herbeheretar Indiak, 1854ko martxoaren 29a – ibidem, 1948ko apirilaren 10a) indonesiar idazle, itzultzaile eta irakaslea izan zen, sunderaz idatzi zuena. Nederlanderaz erraz hitz egiten zuen Garuteko lehen emakumea zen^[1].

Lasminingrat
Bizitza
Jaiotzako izen-deiturak	Raden Ayu Lasminingrat
Jaiotza	Garut, 1854ko martxoaren 29a
Herrialdea	Indonesia
Heriotza	Garut, 1948ko apirilaren 10a (94 urte)
Hezkuntza
Hizkuntzak	indonesiera
Jarduerak
Jarduerak	idazlea

Bizitza

Raden Ayu Lasminingrat Garut hirian jaio zen 1854ko martxoaren 29an. Raden Haji Muhamad Musa Sondako printzearen eta Raden Ayu Ria idazlearen alaba zaharrena zen. Haurtzaroan, denbora batez Raden Haji Muhamad Musaren laguna zen Levyson Normanekin bizi zen Sumedangen. Normanen etxean Saatje deitzen zioten, eta bertan nederlanderaz hitz egiten, irakurtzen eta idazten ikasi zuen^[1].

1871n, Garutera itzuli zen, eta han liburu-itzultzaile lanetan aritu zen. 1875ean Carita Erman liburua argitaratu zuen, Christoph von Schmiden idazlanen itzulpenez osatua. Urtebete geroago, Wanasari atawa roepa-roepa Dongeng Jilid I bilduma plazaratu zuen. Liburu horretarako Vertelsels uit het wonderland voor kinderen, klein en groot eta Europako beste hainbat ipuin itzuli zituen^[2].

1907an emakumeen eskola bat sortu zuen, Sakola Kautamaan Istri. R.A.A Wiratanudatara VIII.a erregeordearen eta koloniako gobernuko funtzionarioen laguntza jaso zuen. Hasieran, zailtasunak izan zituen ikasleak aurkitzeko emakumeen hezkuntzaren aurkako aurreiritziengatik. Arazo hori konpontzeko, bere senideen eta funtzionarioen alabak onartu zituen eskolara^[1].

Irakurtzen, idazten, josten, brodatzen eta puntua egiten irakatsi zien ikasleei. 1913an, eskolak gobernu kolonialaren onarpen ofiziala jaso zuen^[1].

Lasminingrat R.A.A Wiratanudatara VIII.arekin ezkondu zen^[3]. Garuten hil zen 1948ko apirilaren 10ean^[1].

Omenaldiak

Lasminingrati Indonesiako Alfabetatzearen Lehen Ama deitzen zioten. Gobernuak Indonesiako Heroi Nazional izendatzea proposatu zuen^[4].

2019ko martxoaren 29an, Googlek doodle bat eskaini zion^[5][6].