Calciu

El calciu es un elementu químicu, de símbolu Ca y de númeru atómicu 20. La su massa atómica es 40,078 u. El calciu es un metal suave grisáceu, y es el quintu más abundanti en massa en la corteza terrestri. Tamién es el ion más abundanti que s'encuentra disueltu en el áugua de mar tantu comu por la su molaridá y massa, endispués del sodiu, clorurus, magnesiu y sulfatus.^[1]

S'encuentra en el meyu internu los organismus comu ion calciu (Ca²⁺) o formandu parti d'otras moléculas; en argunus seris vivus se halla precipitau en forma d'esqueleto internu o esternu. Los ionis e calciu actúan e cofactor en una hartá reazionis enzimáticas, intervienin en el metabolismu del glucógenu, y junt'al potasiu y el sodiu regulan la contrazión muscular. El porcentaji de calcio en los organismus es variable y dependi las especis, peru por términu meyu representa el 2,45 % en el conjuntu los seris vivus; en los vegetalis, solu representa el 0,007 %.

En la palra vulgar s'estila la vozi calciu pa referirsi a las sus salis (v.g., este áugua tié una hartá calciu; en las tuberías se deposita una hartá calciu, etc.)

Hunción biológica

El calciu actúa comu meyador intracelular cumpliendu una hunción e segundu mensajeru; por ejemplu, el ion Ca²⁺ intervieni en la contrazión los músculus y es imprescindibli pa la coagulación la sangri.^[2] Tamién está implicau en la regulación d'argunas enzimas quinasas que realizan huncionis e fosforilación, por ejemplu la proteína quinasa C (PKC), y realiza unas huncionis enzimáticas similaris a las del magnesiu en procesus e transferencia de fosfatu (por ejemplu, la enzima fosfolipasa A₂). Además, diversus estudius aguran a que el calciu tamién puría sel una señal d'apoptosis, a través la excesiva recaptación del ión en la mitocondria y, por tantu, dandu lugar a una generación e estrés oxidativu.^[3][4][5] El contenedor prencipal e calciu que tié la célula es el retículu endoplasmáticu.^[6][7]