Melatonina

La melatonina o N-acetil-5-metoxitriptamina es una hormona encontrá en animalis, plantas, hongus y bacterias, así comu en argunas algas; en concentracionis que varían d'acuerdu al ciclu diurnu/nocturnu. La melatonina es sintetizá a partil del aminoacidu esencial triptófanu. Se produci, principalmenti, en la glándula pineal, y participa en una gran variedá de procesus celularis, neuroendocrinus y neurofisiológicus.

Una las características más sobresalienti respectu a la biosíntesis pineal e melatonina es la su variabilidá a lo largu del ciclu de 24 horas, y la su respuesta precisa a cambius en la iluminación ambiental. Por ellu, la melatonina se considera una neurohormona producía polos pinealocitus en la glándula pineal (localizá en el diencéfalu), la cual produci la hormona baju la influencia del núcleu supraquiasmáticu del hipotálamu, que recibe enhormación la retina acerca de los patronis diariis de lus y oscuridá.

La glándula pineal los humanus tié un pesu cercanu a los 150 miligramus y ocupa la depressión enti el colículu superior y la parti posterior del cuerpu callosu. A pesal la existencia de conexionis enti la glándula pineal y el cerebru, aquella se encuentra huera la barrera hematoencefálica; y está inervá principalmenti polos nervius simpáticus que procedin los ganglius cervicalis superioris.

En 1917 s'observó in vitro que estractus e glándula pineal producían un aclaramientu en el peyeju de sapu. A finales los 50, Lerner y colaboraoris aislun la hormona pineal a partil e pinealocitus bovinus y describun la su estructura química: 5-metoxi-N-acetiltriptamina (melatonina). Si bien duranti una hartá tiempu se consideró que la melatonina era de nacencia esclusivamenti cerebral, s'á demostrau la biosíntesis del metoxindol en otrus tejíus comu la retina, la glándula harderiana, el hígadu, el intestinu, los riñonis, las adrenalis, el timu, la glándula tiroidis, las células inmunis, el páncreas, los ovarius, el cuerpu carotídeu, la placenta y el endometriu.

En el Homo Sapiens se produci una síntesis constanti de melatonina que disminui abruptamenti hacia los 30 años d'edá. Endispués la pubertá se produci una calcificación llamá "arena cerebral", que recubri la glándula pineal, peru ésta sigui mandandu melatonina. Estudius recientis observan que la melatonina tié, enti otras huncionis (además la hipnoinductora), la de disminuil la oxidación; por estu, los déficits e melatonina casi siempri ván acompañaus los siguientis efectus psíquicus: insomniu y depressión, mientras que, en la metabolización, el déficit e melatonina paezería tenel por contraparti una paulatina aceleración del envejecimientu.

Existen alimentus que poseen precursoris la melatonina. Enti éstus los más comunis son: la avena, las cerezas, el maíz, el vinu tintu, los tomatis, las patatas, las nuecis, las ciruelas^[1] y el arroz.

Los suplementus de melatonina se vendin sin receta y s'estilan pa tratal el insomniu y como alternativa a las benzodiazepinas.

Hunción

La disminución la secreción de melatonina acelera los procesus d'envejecimientu. El timu y la glándula pineal prencipian a envejecel a partil la pubertá. La melatonina atenúa el dañu celular por radicalis libris^[2], estimula el sistema inmuni, protegi el sistema cardiovascular, estabiliza los ritmus biológicus del cuerpu^[3] y estimula la produzión la hormona de crecimientu (GH). Un esperimentu comprobó que la melatonina aumentaba en un 20% la vida los ratonis (manqui puría sel debíu a factoris asociaus).