Gllaciér

Rouése, Biouègno

Cél articllo est ècrit en arpetan supradialèctâl / ORB lârge.

Lo gllaciér d’Aletsch (Suisse), lo més grant gllaciér de les Ârpes.

Un gllaciér est na massa de gllace a pou prés ètendua que sè fôrme per lo tassement de cuches de nê acumulâyes. Ècllafâye desot son prôpro pêds, la nê fât sortir a châ pou l’êr que contint, s’agllète en na massa sarrâye et pués sè vire en gllace.

En Vâl d’Aoûta, diont pletout « na rouése » [ˈrwi.zə] en patouès vâdoten. Pués, emplèyont lo tèrmo « un biouègno^[1] » [ˈbjɛ.ɲo, ˈbju.ɲo]^[1] en doux-três patouès valêsans.

Lo domêno de plasticitât de la gllace étent particuliérement ètendu, un gllaciér dèvale tot plan desot l’èfèt de la gravitât lo long d’una penta ou ben per flluâjo.

« Gllaciér » est un tèrmo arpetan que rencontront dês lo XIV^émo siècllo en Valês et que vint du latin populèro *glaciariu(m), du latin tardif glacia, du latin cllassico glacies (« gllace », « gllaçon »). Dês lo méten du XVIII^émo siècllo, en France, l’âmont mielx u tèrmo « gllaciére » qu’ére adonc empleyê.

Los gllaciérs reprèsentont 60 a 70 % de les égoues doces de la planèta, et pués constituont étot na partia importanta de la criosféra tèrrèstra.

Gllaciérs de l’Arpetania

Los principâls gllaciérs arpetans sont :

Viua sus la Mar de Gllace, en France.

• la Mar de Gllace, lo més grant gllaciér de France, dedens lo massis du Mont-Blanc, en Savouè ;
• lo gllaciér de Corbassiére, dedens les Ârpes pènines, en Valês ;
• lo gllaciér du G·èant, dedens lo massis du Mont-Blanc, en Savouè ;
• lo gllaciér de Chenâl, dedens les Ârpes pènines, en Valês ;
• lo gllaciér d’Argentiére, dedens lo massis du Mont-Blanc, en Savouè ;
• lo gllaciér du Mont Mi-nuet, dedens les Ârpes pènines, en Valês ;
• lo gllaciér de la Planna Môrta^[2], dedens les Ârpes bèrnêses, en Valês ;
• lo gllaciér de Sâl’en-hôt, dedens lo massis du Mont-Blanc, en Valês ;
• lo gllaciér du Treyent^[2], dedens lo massis du Mont-Blanc, en Valês ;
• lo gllaciér de la Grant-Mota, dedens lo massis de la Vanouèsa, en Savouè ;
• lo gllaciér de la Galèsa, dedens les Ârpes grèyes, en Savouè.

Biouègnos du Valês

Los principâls biouègnos valêsans sont :

• lo biouègno d’Hôtèma^[1], dedens les Ârpes pènines ;
• lo biouègno de Fèrpècllo^[1], dedens les Ârpes pènines ;
• lo biouègno du Jietro^[1], dedens les Ârpes pènines ;
• lo biouègno de Champfllèron^[2], dedens les Ârpes bèrnêses.

Rouéses de la Vâl d’Aoûta

Les principâles rouéses vâldotênes sont :

• la rouése du Miâjo, dedens lo massis du Mont-Blanc ;
• la rouése de la Châl de Champ, dedens les Ârpes pènines ;
• la rouése des Grantes Muralyes, dedens les Ârpes pènines.

Vêre avouéc

• Morêna

Bibliografia

• (fr) Marc-Théodore Bourrit (1739-1819), « Description des glacières, glaciers et amas de glace du Duché de Savoye », Geneva, 1773.
• (fr) Jian de Charpentiér, « Essais sur les glaciers et sur le terrain erratique du bassin du Rhône », Losena, 1841.
• (fr) Louis Agace, « Études sur les glaciers », Nôchâtél, 1840.
• (fr) François Bidaut, Jacques Gendrault, « La Mer de glace et le Montenvers », 1997.
• (en) Meredith A. Kelly et al., « A reconstruction of the last glacial maximum (LGM) ice-surface geometry in the western Swiss Alps and contiguous Alpine regions in Italy and France », dedens Eclogae Geologicae Helvetiae, vol. 97, 2004, p. 57-75.
• (fr) Luc Moreau, Robert Vivian, « Dans le secret des glaciers du Mont-Blanc », Grenoblo, 2000.
• (fr) Robert Vivian, « Des glacières du Faucigny aux glaciers du Mont-Blanc », Montmèlyan, 2001.
• (de) Andreas Wipf, « Die Gletscher der Berner, Waadtländer und nördlichen Walliser Alpen », Tsurique, 1999.