María Amelia de Braganza
aristócrata brasileira / From Wikipedia, the free encyclopedia
María Amelia de Braganza, nada en París o 1 de decembro de 1831 e finada en Funchal (Madeira) o 4 de febreiro de 1853, foi unha princesa do Imperio do Brasil e membro da rama brasileira da casa de Braganza. Os seus pais foron o emperador Pedro I, primeiro rexente do Brasil, e Amelia de Leuchtenberg. Única filla do segundo matrimonio do seu pai, María Amelia naceu en Francia trala abdicación de Pedro I en favor do seu fillo Pedro II. Antes de que María Amelia cumprise un ano de idade Pedro I viaxou ata Portugal para restablecer a coroa da filla máis vella do seu primeiro matrimonio, María II, librando con éxito unha guerra contra o seu irmán Miguel I, quen usurpara o trono de María II.
Nome orixinal | (pt) Maria Amélia de Bragança |
---|---|
Biografía | |
Nacemento | 1 de decembro de 1831 París, Francia |
Morte | 4 de febreiro de 1853 (21 anos) Funchal, Portugal |
Causa da morte | tuberculose |
Lugar de sepultura | Río de Xaneiro |
Datos persoais | |
País de nacionalidade | Brasil |
Relixión | Catolicismo |
Actividade | |
Lingua | Lingua portuguesa, lingua francesa, lingua alemá e lingua inglesa |
Outro | |
Título | Princesa |
Familia | Casa de Bragança |
Pais | Pedro I do Brasil e Amelia de Leuchtenberg |
Irmáns | María II de Portugal, Paula Mariana de Bragança (pt) , Isabel Maria de Alcântara Brasileira (pt) , Francisca de Bragança (pt) , Januária Maria de Bragança (pt) , Miguel de Bragança, Príncipe da Beira (pt) , João Carlos, Príncipe da Beira (pt) , Pedro II do Brasil, Pedro de Alcântara Brasileiro de Saisset (pt) e Maria Isabel de Alcântara Bourbon (pt) |
Premios | |
Poucos meses trala súa vitoria Pedro I faleceu a causa dunha tuberculose. A nai de María Amelia levouna a Portugal, onde permaneceu a maior parte da súa vida sen chegar a visitar o Brasil. O goberno brasileiro non recoñeceu a María Amelia como membro da casa imperial do Brasil xa que nacera no estranxeiro, pero cando o seu medio irmán máis vello Pedro II foi declarado maior de idade en 1840, este interveu en favor de María Amelia con éxito.
Prometeuse co arquiduque Maximiliano de Austria a comezos do ano 1852, pero antes de que tivera lugar o matrimonio ela contraeu tuberculose e foi trasladada a vila de Funchal na illa portuguesa de Madeira. Malia o clima de saudable reputación que tiña aquel lugar, a saúde de María Amelia continuou deteriorándose, e faleceu o 4 de febreiro de 1853. O seu corpo foi levado ó continente e soterrado no panteón familiar do mosteiro de São Vicente de Fora. Uns 130 anos despois os seus restos trasladáronse ó Brasil. En conmemoración da súa filla, Amelia de Leuchtenberg financiou a construción do hospital "Princesa D. Maria Amélia" en Funchal. O prometido de María Amelia, Maximiliano, fixo unha peregrinación ata o Brasil e Madeira, viaxe que influíu na súa aceptación do trono de México en 1864.