![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/ca/%2522Imperial_Porphyry%2522_-_porphyritic_metadacite_to_porphyritic_meta-andesite_%2528Dokhan_Volcanics%252C_Neoproterozoic%252C_~593-602_Ma%253B_Mons_Porphyrites%252C_Red_Sea_Mountains%252C_Egypt%2529_2_%252830040632451%2529.jpg/640px-thumbnail.jpg&w=640&q=50)
Pórfiro
rocha volcánica / From Wikipedia, the free encyclopedia
O pórfiro[1] é o nome que se lle dá a granitos ou rochas ígneas de cristais de gran groso como feldespatos ou cuarzos dispersos nunha matriz de gran fino rica en silicatos xeralmente afanítica. Os cristais máis grandes denomínanse fenocristais.[2] No seu uso tradicional non xeolóxico o termo pórfiro adoita referirse á forma de cor vermella-púrpura desta pedra, moi valorada pola súa aparencia, pero tamén se usan outras cores decorativas de pórfiro como a "verde", "negra" e "gris".[3][4]
![Thumb image](http://upload.wikimedia.org/wikipedia/commons/thumb/c/ca/%22Imperial_Porphyry%22_-_porphyritic_metadacite_to_porphyritic_meta-andesite_%28Dokhan_Volcanics%2C_Neoproterozoic%2C_~593-602_Ma%3B_Mons_Porphyrites%2C_Red_Sea_Mountains%2C_Egypt%29_2_%2830040632451%29.jpg/640px-thumbnail.jpg)
![Thumb image](http://upload.wikimedia.org/wikipedia/commons/thumb/6/6d/Rhyolite_porphyry.jpg/640px-Rhyolite_porphyry.jpg)
O termo pórfiro procede do grego antigo πορφύρα (porphyra), que significa 'púrpura'. A cor púrpura era a cor da realeza e o "pórfiro imperial" romano era unha rocha ígnea púrpura intenso con grandes cristais de plaxioclasio. Algúns autores afirmaron que a rocha era a máis dura coñecida na antigüidade.[5] Por esa razón, o pórfiro era moi aprezado nos monumentos e construcións na Roma imperial e posteriormente.
Despois, o nome déuselle a calquera rocha ígnea con grandes cristais. O adxectivo porfírico agora refírese a certa textura de rochas ígneas sen importar cal é a súa composición quimica e mineralóxica. As súas principais características son unha gran diferenza en tamaño entre os pequenos cristais da matriz e os fenocristais moito máis grandes inmersos nela. Os pórfiros poden ser afanitas ou faneritas, é dicir, a matriz pode ter cristais microscópicos como no basalto, ou cristais doadamente distinguibles a simple vista, como no granito.