Bhaskara 1

Bhaskara 1 foi un satélite artificial da India lanzado o 7 de xuño de 1979 mediante un foguete ruso Kosmos 3M desde Kapustin Yar.^[1][2][3][4]

Bhaskara 1
Tipo	Observación terrestre / experimental
Organización	ISRO[1][2]
Data de lanzamento	7 de xuño de 1979[3][4][5]
Foguete portador	Kosmos 3M[1][4]
Sitio de lanzamento	Kapustin Yar[1][4][5]
Obxectivo da misión	Observación terrestre e experimentos tecnolóxicos.[1][4][5]
Decaemento	17 de febreiro de 1989[3]
NSSDC ID	1979-051A
Masa	444,0 kg[1][2][4]
Dimensións	Poliedro de 26 caras de 1,66 m de altura e 1,55 m de diámetro.[4]
v c e

Características

Bhaskara 1, chamado así en honor ós matemáticos indios Bhaskara I e Bhaskara II, foi o segundo satélite artificial da India. Estivo adicado á observación dos recursos terrestres e en particular ás áreas de hidroloxía, a silvicultura e a xeoloxía mediante un sistema de cámaras de televisión de dúas bandas. Estudou tamén os océanos cun radiómetro microondas de dúas frecuencias (SAMIR, polas siglas en inglés).^[1][4]

Como obxectivos secundarios, Bhaskara 1 levaba a bordo experimentos relacionados con sistemas de procesamento e xestión de datos e para a recolección limitada de datos meteorolóxicos de estacións remotas, así como astronomía de raios X.^[1][4]

O satélite tiña forma de poliedro de 26 caras, cunha altura de 1,66 m e un diámetro de 1,55 m. Tras cumprir a súa misión foi apagado en marzo de 1981. Reentrou na atmosfera o 17 de febreiro de 1989.^[1][3][4]