Catablefáridos

Os catablefáridos (Katablepharida), son un grupo de protistas heterótrofos flaxelados,^[1] que foron considerados como pertencentes a Cryptophyta desde que se describiron en 1939. Difiren doutras criptófitas en varios aspectos (aparato da alimentación) e chegou a propoñerse que son alveolados, pero as investigacións realizadas ao comezo do século XXI suxiren que están relacionados coas criptófitas.^[2][3] Parécense ás criptófitas na súa forma, orientación flaxelar e presenza de exactisomas, e as análises do seu SSU rDNA e das secuencias da beta-tubulina achéganos máis ás criptófitas ca aos alveolados. Caracterízanse por ter unha vaíña de dúas capas arredor da célula e superficie flaxelar, cristas mitocondriais tubulares, e un aparato de alimentación complexo moi distintivo.

Catablefáridos
Clasificación científica
Dominio: Eukaryota (sen clasif.) Hacrobia (sen clasif.) Katablepharida

Principais xéneros de catablefáridos

En 2009, só foran descritos formalmente cinco xéneros e dez especies. Coñécense ducias de secuencias de ADN (obtidas de augas doces e mariñas) que parecen representar outras especies de catablefáridos aínda non descritas formalmente nin cultivadas.^[1] Os xéneros principais son:

• Hatena. Presenta formas depredadoras e formas con endosimbiontes fotosintéticos, polo que o establecemento da endosimbiose está a medio camiño neste protista.
• Leucocryptos^[4]
• Katablepharis^[4] O xénero Katablepharis, que lle deu nome ao grupo, foi inicialmente ortografado con th (Kathablepharis), pero despois a ortografía mudou. No código botánico ICBN escríbese sen h, e no zoolóxico ICZN con th, pero publicouse en 2009 unha corrección sen hache no código zoolóxico.
• Roombia^[1]
• Platychilomonas^[1]