Contras

Contras (de "contrarrevolucionarios") é o nome xenérico que reciben varios grupos armados que loitaron contra o goberno da Fronte Sandinista de Liberación Nacional (FSLN), partido socialista revolucionario que tomou o poder en Nicaragua, desde a vitoria da Revolución Sandinista e o fin da ditadura de Anastasio Somoza Debayle, en xullo de 1979.^[1]

Para outras páxinas con títulos homónimos véxase: Contra (homónimos).

Contras
Instancia de	organización armada
Ideoloxía política	anticomunismo
Data
Fundación	1979
Localización
País	Nicaragua
[ Wikidata ] [ C:Commons ]

Organización

Aínda que o movemento incluía diferentes organizacións con diferentes obxectivos e pouca unidade ideolóxica, a Fuerza Democrática de Nicaragua (FDN) foi a maior destas faccións. Porén, en maio de 1987, practicamente todas as organizacións "Contra" foron reagrupadas, polo menos nominalmente, na chamada resistencia nicaraguana (RN).^[2]

Apoios

Desde a fase inicial da guerra de guerrillas, os rebeldes recibiron apoio militar e financeiro dos Estados Unidos, especialmente durante a administración de Ronald Reagan, a través da CIA. Nun primeiro momento, este apoio foi complementado polo goberno da Arxentina, naquel momento, unha ditadura militar autodenominada Proceso de Reorganización Nacional e tamén foi apoiado por narcotraficantes de Colombia, por Taiwán e Israel entre outros.^[3]

Mesmo despois de 1984, cando o Congreso dos Estados Unidos aprobou a Emenda Boland, que restrinxiu o apoio estadounidense aos "Contras", este apoio continuou, en segredo, durante os dous anos seguintes. Para iso empregáronse recursos obtidos ilegalmente mediante a venda de armas a Irán e, sobre todo, mediante o narcotráfico cuberto pola CIA.

Nese momento, o escándalo, coñecido como o caso Irán-Contra, tivo un gran impacto nos Estados Unidos e puxo en risco o segundo mandato do presidente Reagan.^[4]

Audiovisuais

O tema foi tratado no filme de 1996 Carla's Song de Ken Loach, na película de 2014 Kill the Messenger e en Freeway: Crack in the system, un documental de 2015 sobre o narcotraficante Rick Ross, coñecido como "Freeway".

Notas

1. "Reagan and the 'Iran-Contra' affair".
2. NICARAGUA. Quid .
3. Omnimaster (2020-06-14). "Civil War: Nicaragua (1978-1979 and 1980-1989)" (en inglés). Consultado o 2024-08-01.
4. "contra". Arquivado dende o orixinal o 2013-10-07.