European Venus Explorer

A European Venus Explorer (EVE), coñecida até 2007 como Venus Entry Probe (VEP), é unha sonda espacial proposta da Axencia Espacial Europea para Venus. Na cronoloxía do TRS de 2005 (technology reference study, estudo de referencia tecnolóxica), propúxose que a nave espacial fose lanzada nun vehículo de lanzamento Soiuz-2 / Fregat ao redor de 2013.^[1] Porén, as solicitudes para financiar e desenvolver a nave espacial en 2007^[2] e 2010^[3] foron rexeitadas.

Cosmic Vision
Datos da misión
Misión:	European Venus Explorer
Rampla de lanzamento:	Guayana Francesa, Porto Espacial de Kourou
Vehículo de lanzamento:	Soiuz-2 / Fregat
Duración:	Cronograma variable

EVE foi unha proposta de misión de clase media no programa Cosmic Vision.^[4] O concepto da misión consistía nun orbitador e un globo que circunnavegarían o planeta ao longo dunha semana, e unha sonda de aterraxe que funcionaría durante aproximadamente unha hora na superficie.^[5]

Aínda que a VEP non foi escollida finalmente para a súa realización na quenda de selección de 2007 por motivos programáticos, a misión EVE foi sinalada como punto de referencia útil para futuras misións^[6].

Visión xeral

O concepto da misión precisa de dous satélites: o Venus Polar Orbiter (VPO), para a teledetección da atmosfera, e o Venus Elliptical Orbiter (VEO), que desprega a sonda de entrada desde unha órbita altamente elíptica. A sonda de entrada contería un globo-aerobot que flota en condicións benignas a 55 km de altitude na capa media de nubes, e deixaría caer até 15 microsondas á baixa atmosfera.^{[1] [5]}