Fanta

Fanta é unha marca e empresa de bebidas refrescantes propiedade de Coca-Cola. Os sabores máis coñecidos son os de limón e laranxa aínda que hai máis de 70 sabores, con variantes para mercados locais. Véndese en formato botella de plástico e lata. Existe tamén o formato botella de vidro para hostalería e o xarope concentrado para surtidor ao que se engade auga e gas.

Fanta
Instancia de marca comercial  Subclase de gasosa  Nome orixinal Fanta  Epónimo fantasía
Texto lema Trinke Fanta - sei Bamboocha
Implicados  Propietario/a The Coca-Cola Company
Datas  Fundación / creación 1940
Localización  País de orixe Alemaña
Identificadores Freebase /m/021_jr
Fontes e ligazóns  Páxina WEB fanta.com Redes
Wikidata G:Commons C:Commons

Historia

As orixes da marca están nos inicios da segunda guerra mundial. Co bloqueo económico a fábrica de Coca-Cola en Alemaña quedou illada da empresa dos Estados Unidos. Non tendo acceso ás materias primas necesarias para fabricar Coca-Cola, decidiron sacar un produto alternativo coas materias ás que tiñan acceso.

O nome da empresa veu dun concurso interno no que se pedía aos traballadores que propuxeran un novo nome deixando voar a súa fantasía (en alemán fantasie) do cal xurdiu Fanta.

Rematada a segunda guerra mundial Coca-Cola recuperaría o control das súas fábricas en Alemaña e continuaría coa produción de Fanta. En 1961, chegaría a España o sabor a laranxa e en 1962 o sabor a limón.

Ingredientes

Botella clásica de Fanta, reproducida no seu 75 aniversario.

Os ingredientes varían duns países a outros, a receita básica contén:

• Fanta laranxa: auga carbonatada, azucre, zume de laranxa 8% en España (de concentrado), aromas, acidulante E330, conservante E211, antioxidante E300, estabilizante E412 e colorante E160a.^{[Cómpre referencia]}

A diferenza das variedades europeas, en Latinoamérica non contén zume de laranxa nin polpa, coma a Fanta comercializada en Europa similar á Orangina, Mirinda, Kas ou TriNa.^{[Cómpre referencia]}

• Fanta limón: Auga carbonatada, azucre, 6% de zume de limón, aromas, acidulante E330, conservante E211, antioxidante E300, estabilizante E414, estabilizante E445 e colorante E104.^{[Cómpre referencia]}

Hai estudos que indican que o colorante E104, chamado amarelo de quinoleína, incrementa a hiperactividade dos nenos e causa dermatite.^[1] O uso deste colorante está prohibido nos Estados Unidos, Australia, o Xapón e Noruega.^[2] Conter E104 é unha das causas polas que non existe Fanta Limón en numerosos países.