Gravado

O gravado^[1] ou gravura^[2] é a arte de converter (e tamén a transformación en si) unha superficie plana nunha matriz que serve de punto inicial para a reprodución dunha imaxe.

Gravado de Durero, San Xerónimo no seu estudio, 1514.

Punzóns para gravado

O gravado (que literalmente é facer unha incisión) faise normalmente sobre metal ou sobre madeira (xilografía). Mediante o proceso de gravar obtense unha matriz que se utilizará para estampar, normalmente sobre papel ou tea, e obter o que comunmente se chama "gravado" pero que especificamente é unha estampa. Este proceso permite obter varios exemplares dunha mesma matriz, aínda que cada unha das estampas ou copias é unha obra única. Segundo a técnica ou material usados, poden ser:

• Gravado en relevo (xilografía, linoleografía...)
• Gravado en oco (buril, punta seca, maneira negra, augaforte, augatinta, verniz brando...)
• Gravado planográfico (litografía, serigrafía...)